Երեկ դատաիրավական բարեփոխումների շուրջ հրավիրված խորհրդակցության ժամանակ Սերժ Սարգսյանն անդրադարձավ 2008թ. մարտի 1-ի դեպքերի առիթով հարուցված քրեական գործի ընթացքին` ընդգծելով, որ այդ հարցը անձնապես իր համար «շատ կարևոր» է. «Ձեզ ուղղված իմ պահանջն է` կրկին և առավել մանրակրկիտ անդրադառնալ նույնիսկ այն հանգամանքներին, որտեղ, ըստ ձեզ, որևէ նոր բան չի կարող լինել: Փորձեք այդ դեպքերի բացահայտման նոր ուղիներ գտնել: Արդեն տևական ժամանակ է անցել, գուցե մարդիկ կան, ովքեր ականատես են եղել և այն ժամանակ չէին ուզում համագործակցել իրավապահ մարմինների հետ, իսկ հիմա այլ մոտեցումներ ունեն: Սա էլ է շատ հնարավոր»,- ասել էր նա:
«Առաջին լրատվական»-ի խնդրանքով անդրադառնալով Ս.Սարգսյանի նշյալ հայտարարությանը հաջորդող հնարավոր քայլերին`Հայաստանի լիբերալ կուսակցության առաջնորդ Հովհաննես Հովհաննիսյանը նշեց. «Սերժ Սարգսյանի անկեղծության չափը չգիտեմ:Համենայնդեպս, այն, ինչ նա երեկ հայտարարեց,անխուսափելի էր: Կարծում եմ՝ նա գիտակցեց և շատ ուշացումով, բայց, ի վերջո, նման հայտարարություն արեց: Հետևանքները կարող են լինել այն, որ եթե Ս.Սարգսյանն ընդհանրապես Հայ ազգային կոնգրեսի ներկայացրած երեք կետերը ամբողջությամբ իրագործի,այդ դեպքում արդեն կարող ենք, ինչպես հայտարարել է Լևոն Տեր-Պետրոսյանը, նստել բանակցությունների` Ս.Սարգսյանի հրաժարականի և նոր ընտրությունների անցկացման շուրջ: Սա բխում է մեր պետության շահերից»:
Իսկ հնարավո՞ր է, որ Ս.Սարգսյանի այս հայտարարությունը փոքր-ինչ մեղմի իշխանության և ընդդիմության միջևջրբաժանի հաստատման հնարավորությունը` հարցրինք Հ.Հովհաննիսյանին. «Իհարկե ոչ: Որովհետև այդ երեք պահանջները տրամաբանորեն իրար հետ փոխկապակցված են, դրանք պարզապես պահանջներ չեն: Այդպես չէ, որ այդ երեք պահանջներից մեկը կարող են կատարել, հետո մի կես տարի էլ սպասենք՝ մյուսը կատարվի… Այդպես չէ: Մենք մինչև ապրիլի 28-ը ակնկալում էինք երեք պահանջների բավարարում: Եթե անգամ պահանջներից երկուսը բարարվեն` մենք կհամարենք, որ մեր պահանջները չեն բավարարվել»: