Նախագահ Սերժ Սարգսյանն այսօր պատասխանել է Րաֆֆի Հովհաննիսյանի նամակին և նրան առաջարկել դադարեցնել հացադուլն ու առանց շոուների աշխատել նրա կողմից առաջարկված՝ «թեկուզև շատ հում շարադրանքի» վրա: Չի բացառվում, որ առաջիկայում Ր. Հովհաննիսյանն ու Ս. Սարգսյանը սկսեն բանակցել նոր կոալիցիայի կազմավորման շուրջ:
Հիշեցնենք, որ անցած ուրբաթ «Ժառանգության» ղեկավարը առաջարկներ էր ուղարկել նախագահական, որն, ըստ էության, կարող է դիտարկվել որպես միասին կոալիցիա կազմելու առաջարկ: Եվ եթե Ս. Սարգսյանը նման կերպ է արձագանքում, ապա չի բացառվում, որ ընդունում է այդ առաջարկը:
Հիշեցնենք նաև, որ Ր. Հովհաննիսյանն իր նամակում գրել էր, թե Ս. Սարգսյանին «հնարավորություն կտա շարունակելու որպես դե ֆակտո նախագահ», եթե նա կատարի իր նամակում առաջ քաշված առաջարկները: «Ժառանգության» առաջնորդը առաջարկում էր փոփոխություններ կատարել Ընտրական օրենսգրքում և սահմանել միայն 100 տոկոսանոց համամասնական ընտրակարգ, աշխատանքից ազատել և պատասխանատվության ենթարկել ընտրակեղծարար քաղաքապետներին ու մարզպետներին: Եվ, որ ամենակարևորն է, Գլխավոր դատախազի, ԱԱԾ պետի, Վերահսկիչ պալատի նախագահի, Հակակոռուպցիոն հանձնաժողովի ղեկավարներ և արտաքին գործերի և կրթության ու գիտության նախարարներ նշանակել իր ներկայացրած մարդկանց:
Առայժմ դժվար է ասել, թե ինչպես կպատասխանի Ս. Սարգսյանը՝ կընդունի՞ այդ առաջարկությունը, թե՞ ինքը առաջարկներ կանի, եթե նրանք կրկին կհանդիպեն՝ գտնելու ինչ-որ փոխադարձ ընդունելի տաբերակներ: Ամեն դեպքում Ր. Հովհաննիսյանի առաջարկները քննարկելի են և կարող են նախապես արդեն ձեռնտու լինել Ս. Սարգսյանին:
Նախագահական ընտրություններից հետո թե քաղաքական դաշտում և թե հանրության մեջ կտրուկ փոփոխությունների ակնկալիք կա: Ս. Սարգսյանն ինքն էլ է հաճախ խոսում փոփոխությունների և բարեփոխումների մասին: Եվ չի բացառվում, որ Ր. Հովհաննիսյանի առաջարկն այս դեպքում տեղին լինի, և իշխանություններն այդ փոփոխությանը գնան՝ պատճառաբանելով հենց այդ առաջարկներով:
Սեպտեմբերին լրանալու է Գլխավոր դատախազ Աղվան Հովսեփյանի պաշտոնավարման ժամկետը. այսպես թե այնպես՝ նոր Գլխավոր դատախազ պետք է նշանակվի: Արդեն հրապարակումներ կան, թե ԱԱԾ պետ Գորիկ Հակոբյանը հիվանդ է և նոր կառավարության ձևավորումից հետո չի պաշտոնավարելու: Եվ եթե այս կառույցը մնա առանձին և չմիանա Ոստիկանությանը, նոր պետ պետք է ունենա: Այսինքն՝ Ս. Սարգսյանը նոր Գլխավոր դատախազ և ԱԱԾ պետ պետք է գտնի: Չի բացառվում, որ նա ցանկանա փոփոխել նաև որոշ մարզպետների և համայնքապետերի, ինչպես նաև Ր. Հովհաննիսյանի նշած մյուս գերատեսչությունների ղեկավարներին: Այնպես որ՝ «Ժառանգության» ղեկավարն ու Ս. Սարգսյանը քննարկելու ընդհանուր բան ունեն:
Իհարկե, վերը նշված փոփոխությունները չեն նշանակում, թե Ս. Սարգսյանը Գլխավոր դատախազ կամ ԱԱԾ պետ կնշանակի Ր. Հովհաննիսյանի առաջարկած մարդկանց, ասենք՝ Զարուհի Փոստանջյանին կամ Արմեն Մարտիրոսյանին: Հավանաբար, նրանք միասին որևէ մեկին կընտրեն, որը կլինի երկուստեք ընդունելի թեկնածու:
Իշխանությունների համար առանցքային այդ պաշտոնները երբեք որևէ կուսակցության չեն տրվում, եթե անգամ այդ կուսակցությունը կոալիցիոն գործընկեր է: Նախագահը իր դիրքերն ամուր պահելու համար ուժային և տնտեսական ոլորտների առանցքային կառույցների ղեկավարներին անձամբ է նշանակում՝ նույնիսկ երբեմն հաշվի չառնելով իր կուսակցության ցանկությունն ու կարծիքը: Այնպես որ՝ միամիտ կլինի կարծել, թե Ս. Սարգսյանը Գլխավոր դատախազ կամ Պետեկամուտների կոմիտեի նախագահ կնշանակի Ր. Հովհաննիսյանի առաջարկած թեկնածուներին: Համաձայնության գալու դեպքում, իհարկե, որոշակի պաշտոններ կհատկացնի, բայց՝ ոչ դրանք: Այդ պաշտոններին կարող են նշանակվել այլ մարդիկ, որոնք միգուցե ընդունելի լինեն նաև Ր. Հովհաննիսյանի կողմից:
Չի բացառվում նաև, որ Ս. Սարգսյանը ցանկանա իրական բարեփոխումներ իրականացնել տարբեր ոլորտներում: Եվ այստեղ արդեն Ր. Հովհաննիսյանին ու «Ժառանգությանը» օգտագործելը շատ հարմար կլինի: Ամեն դեպքում՝ եթե «Ժառանգությունը» կոալիցիա մտնի, որոշակի փոփոխություններ կարելի է ակնկալել: Սակայն իշխանության վերնախավում, անգամ Հանրապետական կուսակցությունում այնքան էլ ոգևորված չեն «Ժառանգության» հետ կոալիցիա կազմելու հեռանկարով:
Այդ առումով ՀՀԿ-ն երկու մասի է բաժանված. ՀՀԿ-ի մի մասն իսկապես ցանկանում է ավելի շուտ «Ժառանգության» հետ համագործակցել, քան «Բարգավաճ Հայաստան»-ի: «Ժառանգության» հետ կոալիցիա կազմելուն ակնհայտորեն դեմ են ԱԺ նախագահ Հովիկ Աբրահամյանն ու նրա ազդեցության տակ գտնվող ՀՀԿ-ականները: Օրինակ՝ ՀՀԿ փոխնախագահ Գալուստ Սահակյանը անցած ուրբաթ մեզ հետ զրույցում ասել էր, թե Ր. Հովհաննիսյանի առաջարկներն ուշացած են: ԱԺ պետաիրավական հանձնաժողովի նախագահ Դավիթ Հարությունյանն այսօր հայտարարել էր, թե լուրջ չի վերաբերում Ր. Հովհաննիսյանի առաջարկներին, և այդ հարցը կուսակցությունում քննարկվելու դեպքում կներկայացնի իր դիտողությունները:
Այսպիսով՝ «Ժառանգության» հետ կոալիցիա կազմելուն դեմ է ՀՀԿ-ի այն հատվածը, ով շահագրգիռ է դա անել «Բարգավաճ Հայաստան» կուսակցության հետ: Հ. Աբրահամյանը ցանկանում է ԲՀԿ-ին բերել կոալիցիա, որն այս անգամ կարծես չի ստացվում: Եվ առաջիկայում եթե իսկապես «Ժառանգության» հետ համագործակցությունը լուրջ լինի, թե՛ ԲՀԿ-ից, թե՛ ՀՀԿ-ի այդ հատվածից դիմադրության լուրջ գործընթաց կսկսվի: