«Առաջին լրատվական»-ի տեղեկություններով՝ ԱԺ պետաիրավական հարցերի մշտական հանձնաժողովի նախագահ Դավիթ Հարությունյանը ցանկանում է դառնալ ՀՀ գլխավոր դատախազ:
Հիշեցնենք, որ գործող Գլխավոր դատախազ Աղվան Հովսեփյանի պաշտոնավարման ժամկետն ավարտվում է սեպտեմբերին, և այսպես թե այնպես իշխանությունները պետք է նոր դատախազի թեկնածու գտնեն: Իհարկե, իշխանությունների մեջ քիչ չեն այդ պաշտոնին ձգտողները, այդ թվում նաև՝ 10 տարի արդարադատության նախարար եղած Դ. Հարությունյանը:
Ինչպես հայտնի է, ԱԺ-ում այժմ քննարկվում է ՀԱԿ-ի ներկայացրած՝ մարտի 1-2-ի իրադարձություններն ուսումնասիրող նոր ժամանակավոր հանձնաժողով ստեղծելու նախագիծը: Իշխանությունները նույնպես կողմ են այդ կառույցի ստեղծմանը: Ասում են, որ Դ. Հարությունյանը ԱԺ նախագահ Հովիկ Աբրահամյանի հետ կարողացել է համոզել նախագահ Սերժ Սարգսյանին՝ ստեղծելու այդ հանձնաժողովը՝ հատկապես, որ դժվար կլինի տալ մերժման բացատրություններ:
Հիշեցնենք նաև, որ համաձայն այդ նախագծի՝ հանձնաժողովը պետք է ստուգի այդ իրադարձությունների հետ կապված՝ Գլխավոր դատախազության, Հատուկ քննչական ծառայության և Ոստիկանության գործունեության օրինականությունը: Մամուլում հրապարակվել է, թե ժամանակավոր հանձնաժողովի նախագահի հարցում այժմ մրցակցում են Դ. Հարությունյանը և ՀԱԿ անդամ Գագիկ Ջհանգիրյանը:
Անկախ նրանից՝ Դ. Հարությունյանը կդառնա այդ հանձնաժողովի նախագահ, թե ոչ, նա կընդգրկվի այդ կառույցի կազմում: Եվ հանձնաժողովում ունեցած լծակներն օգտագործելով՝ Դ. Հարությունյանը կարող է իրեն հատուկ նուրբ, բայց նկատելի ձևով քննադատել Գլխավոր դատախազության աշխատանքը և բացասական մթնոլորտ ստեղծել այդ առումով: Եվ, որ ամենակարևորն է, նա այդպիսով կկարողանա իրեն մատուցել որպես այդ պաշտոնի ամենահարմար թեկնածու:
Ակնհայտորեն Դ. Հարությունյանն իրեն իրացված և լավ չի զգում պատգամավորի, թեկուզև ԱԺ մշտական հանձնաժողովի նախագահի դերում: Նա միանշանակ ցանկանում է ավելի մեծ լիազորություններ ունենալ իր սիրելի իրավապահ համակարգի վրա, ինչը նա կորցրել է 2007 թվականից հետո: Մինչ նախագահական ընտրությունները՝ կարծիք կար, թե նա ցանկանում է դառնալ ԱԺ նախագահ, եթե Հ. Աբրահամյանը հրաժարական տա: Սակայն կարծես առաջիկայում նման փոփոխություն չի սպասվում, և Դ. Հարությունյանին մնում է ձգտել Գլխավոր դատախազության պաշտոնին:
Ի դեպ, որոշ տեղեկությունների համաձայն՝ Ա. Հովսեփյանի հետ Դ. Հարությունյանի հարաբերությունները լարված են, ինչը սկիզբ է առել դեռևս նրա՝ արդարադատության նախարար եղած տարիներից: Իսկ սեպտեմբերից հետո, ասում են, Գլխավոր դատախազի պաշտոնի վրա աչք ունի նաև «Օրինաց երկիր» կուսակցության նախագահ Արթուր Բաղդասարյանը: Ասում են նաև, որ Դ. Հարությունյանը նրա հետ նույնպես լարված հարաբերությունների մեջ է:
Լուսանկարը՝ PanARMENIAN Photo-ի