Հացադուլի տասնվեցերորդ օրը ՀՀ նախագահի նախկին թեկնածու, «Ժառանգության» առաջնորդ Րաֆֆի Հովհաննիսյանի ինքնազգացողությունը լավ է:
Նշենք, որ Րաֆֆի Հովհաննիսյանն իր գլխավերևում փակցրել է «Լավ եմ, շնորհակալություն» գրությունը՝ անընդհատ տարբեր մարդկանց չկրկնելու համար:
Հովհաննիսյանից մի քանի քայլ այն կողմ այսօր նստել էր Յանկի Յանդևալ անունով ֆրանսախոս մի բելգիացի՝ «Աղոթենք միասին հայերի միասնության համար» գրությամբ: Պաստառի հեղինակն ազգությամբ հայ իր կինն է:
Ազատության հրապարակում շարունակվում է ստորագրահավաքը՝ մարդիկ գալիս և ստորագրում են այն ձևաթղթի տակ, որով պարտավորվում են զորակցել Րաֆֆի Հովհաննիսյանին և ապրիլի 9-ին մասնակցել վերջինիս երդմնակալությանը:
«Առաջին լրատվական»-ի հետ զրույցում «Ժառանգություն» կուսակցության անդամ Մամիկոն Սարգսյանը նշեց, որ մինչև այսօր միայն Ազատության հրապարակում ստորագրել է մոտ 30.000 մարդ, սակայն ստորագրահավաքը շարունակվում է մարզերում և գյուղերում, որտեղ ստորագրողների քանակն առայժմ հայտնի չէ:
Ի դեպ, մենք զրուցեցինք նաև հրապարակ եկած և ստորագրահավաքին միացած ՀՀ մի քանի քաղաքացիների հետ՝ պարզելու, թե համաձա՞յն են արդյոք Րաֆֆի Հովհաննիսյանի՝ ուրբաթ օրը Սերժ Սարգսյանին հնչեցրած առաջարկների հետ: Վերջիններս կտրականապես դեմ էին այն դիտարկմանը, թե կարելի է ճանաչել Սերժ Սարգսյանի նախագահությունը՝ մի քանի պաշտոններում «Ժառանգության» անդամներին նշանակելու դիմաց: Հրապարակ եկած քաղաքացիներից մեկն էլ «Առաջին լրատվական»-ի հետ զրույցում ասաց, որ այդ առաջարկը Րաֆֆի Հովհաննիսյանը պետք է քննարկեր ժողովրդի հետ և հետո ներկայացներ Սերժ Սարգսյանին:
