Ադրբեջանական APA լրատվական գործակալությանը տված հարցազրույցի ժամանակ թուրք քաղաքագետ, պատմաբան, «Հայկական հարցը ռուսական պետական արխիվային 120 փաստաթղթերում» գրքի հեղինակ Մեհմեթ Փերինչեքն անդրադարձ է կատարել Լեռնային Ղարաբաղի հակամարտության կարգավորմանը.
«Խաղաղ ճանապարհով ղարաբաղյան հակամարտության կարգավորումը շատ բարդ խնդիր է, քանի որ այստեղ առկա են բազմաթիվ գործոններ: Դրանք վերաբերում են Ռուսաստանին ու Արևմուտքին, Ադրբեջանին ու Հայաստանին: Դրա համար էլ անհնարին կլինի մոտ ժամանակներում այդ խնդրի կարգավորումը:
Թուրքիան ակնհայտորեն աջակցում է Ադրբեջանին: Մինչդեռ Ռուսաստանը սկսել է առավել կողմնորոշվել դեպի Ադրբեջան, քանի որ Հայաստանի ու ԱՄՆ-ի միջև բանակցություններ են կայացել:
Դրանցում խոսք է գնացել այն մասին, որ ԱՄՆ-ը կարող է ճանաչել Ղարաբաղի անկախությունը, եթե Հայաստանն իր տարածքից դուրս բերի ռուսական ռազմաբազաները: Ռուսաստանին էլ հայտնի են դարձել այդ բանակցությունների մասին, ինչն էլ պատճառ է դարձել, որ Ռուսաստանն առավել շատ կողմնորոշվի դեպի Ադրբեջան:
Իսկ ինչ վերաբերում է հայ-թուրքական հարաբերությունների կարգավորմանը, ապա մոտ ապագայում դա տեղի չի ունենա: Ընդհանրապես, հայ-թուրքական արձանագրությունների ստորագրումը 100 տոկոսանոց սխալ քայլ էր և ես հուսով եմ, որ Թուրքիայի արտգործնախարարությունն ու կառավարությունն արդեն գիտակցել են դա»:
Հիշեցնենք, որ Փերինչեքի վերոնշյալ գրքի շնորհանդեսը տեղի է ունեցել այսօր Մոսկվայում: Գրքի ստեղծման համար Փերինչեքը 10 տարի աշխատել է ռուսական արխիվներում:
Ի դեպ, նախորդ տարվա ամռանը Փերինչեքը հայտարարել էր, որ ԱՄՆ-ը ամեն ինչ կանի` Թուրքիային թուլացնելու համար:
