CnnTürk-ի փոխանցմամբ, Թուրքիայի նախագահ Աբդուլլահ Գյուլը Չանքայա նախագահական նստավայրում ընդունել է Թուրքիայի Ազգային մեծ ժողովի (ԹԱՄԺ) նախագահ Մեհմեթ Ալի Շահինին: Հանդիպման ժամանակ կողմերը քննարկել են Բարձրագույն ընտրական խորհրդի (YSK) կողմից քրդական «Խաղաղություն և ժողովրդավարություն» կուսակցության (ԽԺԿ) 7 ներկայացուցիչների վրա վետո դնելը:
Բացի այդ, այսօր թուրքական ժամանակով 19.00-ին Գյուլը պլանավորել էր տվյալ խնդրի շուրջ հանդիպում ունենալ ԽԺԿ նախագահ Սելահաթթին Դեմիրթաշի հետ, սակայն վերջինս մերժել է Գյուլի հրավերը` պատճառաբանելով, որ այսօր Դիարբեքիրի Բիսմիլ շրջանում տեղի ունեցած բողոքի ցույցի ժամանակ թուրքական ոստիկանությունը կրակ է բացել քուրդ ցուցարարների վրա: Դրա արդյունքում սպանվել է 1 և վիրավորվել 3 ցուցարար:
Հիշեցնենք, որ երեկ Սելահաթթին Դեմիրթաշը, մեկնաբանելով YSK-ի որոշումը, հայտարարել էր, որ դրանով թուրքական իշխանությունները ցանկանում են շարունակել քրդերի դեմ պատերազմը:
