Այսօր «Մրցակցային և պետական օժանդակության կիրարկման հզորացումը Հայաստանում» թեմայով քննարկման ժամանակ գերմանացի փորձագետ Շթոքմանը նշեց, որ մրցակցության պաշտպանության մարմիններին ստուգումների կազմակերպման իրավասությամբ օժտելը կարևոր տարր է հատկապես հակամրցակցային համաձայնությունները կանխելու համար:
Հիշեցնենք, որ օրերս ԱԺ-ում քննարկվում էր մի օրենսդրական նախագիծ, որով նախատեսվում էր, բացի ՏՄՊՊՀ-ի կողմից կիրառվող պատժաչափերի մեծացումից, ներդնել նաև ստուգումների կազմակերպման այս ինստիտուտը: Սակայն քննարկումներից հետո այդ դրույթը հանվեց նախագծից:
ՏՄՊՊՀ նախագահ Արտակ Շաբոյանը ևս այսօր հայտարարեց, որ իր կարծիքով, պետք էր նման լիազորություն տալ ՏՄՊՊՀ-ին: Նա նշեց, որ ԱԺ-ում այս առաջարկը մերժելու պատճառն այն էր, որ պետք չէ ստուգումներով ծանրաբեռնել տնտեսվարողներին, իսկ եթե ՏՄՊՊՀ-ն գտնում է, որ անհրաժեշտ են ստուգումներ, ապա այդպիսի առաջարկ կարող է ներկայացնել ՊԵԿ-ին:
Սակայն, ինչպես իր խոսքում նշեց Շթոքմանը, ԵՄ երկրներում մրցակցության պաշտպանության մարմինները սովորաբար խուսափում են հարկային մարմինների հետ աշխատելուց կամ համագործակցելուց: «Գերմանիայում, օրինակ, որտեղ ես երկար տարիներ աշխատել եմ, մենք չէինք տրամադրում մեր փաստաթղթերն ու տեղեկությունները հարկային մարմիններին»,- նշեց Շթոքմանը` հավելելով, որ եթե որևէ ոլորտում հակամրցակցային համաձայնության վերաբերյալ կասկածներ կան, ապա հնարավորինս քիչ մարդիկ պետք է իմանան, որ մրցակցության պաշտպանության մարմինները պատրաստվում են համապատասխան քայլեր կիրառել, քանի որ հակառակ դեպքում տնտեսվարողները կարող են արագ վերացնել հակամրցակցային համաձայնության փաստն ապացուցող հանգամանքները:
