«Առաջին լրատվական»-ը ներկայացնում է «Բողոք երկրի սրտից» հաղորդաշարի հերթական թողարկումը: Երկրի սրտում՝ Հանրապետության հրապարակում, իր բողոքն է հայտնում Աշտարակ քաղաքի բնակիչ, երիտասարդ բանաստեղծ Հայկազ Մակարյանը:
Նա ապրում է ծայրահեղ վատ պայմաններում, երկկողմանի ծնողազուրկ է և ունի կեցության ու աշխատանքի տեղավորման խնդիրներ: «Մեր իշխանական դեմքերի անտարբերության, ապատիայի և ցինիզմի պատճառով միչև օրս լուծում չի ստացել խնդիրներից և ոչ մեկը»,- շեշտեց Հայկազ Մակարյանը:
Նա մանրամասնեց, որ բազմաթիվ տեղեր է դիմել աշխատանքի համար, բայց ապարդյուն, լսել է սին ու փուչ խոստումներ միայն: Վերջերս, օրինակ, նրան աշխատանք է խոստացած եղել նաև ԱԺ պատգամավոր Արագած Ախոյանը, բայց՝ «ոչ մի բանեց չարեց»: «Իմ զանգը, իմ պահանջը ընդամենը մեկն է. երբ մարդուն խոստանում են ու հուսախաբ անում, շատ վատ երևույթ է… Սպառնաց, որ ինձ կծեծի և այլն»,- նշեց նա:
Հայկազ Մակարյանն ասաց, որ հաղորդաշար է ունեցել Հ3 հեռուստաընկերությունում, սակայն այնտեղից կրճատվել է հիմնականում այն պատճառով, որ «Անտարբերություն» հաղորդաշարի ընթացքում սուր հարցեր է բարձրացրել:
Այս երիտասարդը դիմել է նաև նախագահական, Արագածոտնի մարզպետին, սակայն ոչ մի տեղից աջակցություն չեն ցուցաբերել:
Հայկազն ընդգծեց, որ հիմա իր կոչը, իր խնդրանքն ուղղում է Սփյուռքին, աշխարհասփյուռ հայերին. «Այլևս ես Հայաստանի հետ ոչ մի հույս չեմ կապում. բարոյականությունը, պատիվը հարգանքը… ամեն ինչ հօդս վերացել է»:
Երևանի Կոմիտասի անվան պետական կոնսերվատորիայի դոցենտ Մարգարիտ Շահինյանը «Առաջին լրատվական»-ի հաղորդաշարի ընթացքում ասաց, որ Հայկազին արդեն մի քանի տարի է, ինչ ճանաչում է, և ափսոսում է, որ նրա նման երիտասարդը ուզում է լքել հայրենիքը: Ըստ նրա՝ Հայկազը ոչ թե հայրենիքից է նեղացած, այլ այս համակարգից, իշխանություններից, որոնք չեն տեսնում, թե երիտասարդների համար ինչպիսի միջավայր են ստեղծել:
Մանրամասները՝ տեսանյութում: