RBC-ի փոխանցմամբ՝ Bloomberg-ի փորձագետները կարծում են, որ ղազախական թենգեի արժեզրկումից հետո նման անկում սպասվում է ևս 10 երկրի արժույթներին, որոնց թվում կան նաև հետխորհորդային երկրներ։ Որպես դրա պատճառ է նշվում ռուսական ռուբլու և չինական յուանի փոխարժեքի անկումը։
Ռուսական ռուբլու անկումը ազդում է հատկապես հետխորհրդային տարածքի երկրների վրա, որոնք առևտրային սերտ կապեր ունեն Ռուսաստանի հետ։ Bloomberg-ի փորձագետները հնարավոր են համարում նաև հայկական դրամի արժեզրկումը։ Վերջին մեկ տարում հայկական դրամն արժեզրկվել է 15 տոկոսով, մինչդեռ ռուսական ռուբլու անկումը կազմել է 46 տոկոս։
Ղազախական թենգեի անկումը կարող է բացասաբար ազդել նաև Տաջիկստանի և Թուրքմենստանի արժույթների վրա։ Կանխատեսվում է, որ թուրքմենական մանաթը առաջիկա կես տարում կարժեզրկվի 20 տոկոսով, իսկ տաջիկական սոմոնին՝ 10-20 տոկոսով։ Bloomberg-ն ակնկալում է նաև ղրղըզական սոմի անկում։
Չի բացառվում, որ կարժեզրկվի նաև Սաուդյան Արաբիայի արժույթը՝ ռիալը։ Կանխատեսվում է, որ Նիգերիայի արժույթ նայրան կարժեզրկվի 20 տոկոսով, իսկ եգիպտական ֆունտը առաջիկա 12 ամսում կարժեզրկվի 22 տոոկսով։ Խնդիրներ են սպասվում նաև թուրքական լիրային՝ կապված այդ երկրում արտահերթ խորհրդարանական ընտրություններ անցկացնելու հնարավորության հետ։
Չինաստանի հետ առևտրային սերտ հարաբերություն ունեցող Զամբիայում նույնպես սպասվում է ազգային արժույթի (կվաչա) արժեզրկում։ Bloomberg-ը կանխատեսում է նաև Գանայի ազգային արժույթ սեդիի փոխարժեքի անկում։
