Բոլոր այն տեսանյութերը, որոնք այսուհետ կվերբեռնվեն YouTube կայքում, կլինեն նոր ֆորմատով: Այդ ֆորմատը կոչվում է WebM, որը մշակել է Google-ը` Opera-ի և Mozilla-ի հետ համատեղ: Ավելի ուշ YouTube-ի ողջ արխիվը կփոխարկվի այս ֆորմատի: Այժմ վերակոդավորվել է արխիվի մոտ 30%-ը, որոնք կայքում դիտված տեսանյութերի 99%-ն են:
Այս վերակոդավորումը պայմանավորված է այն հանգամանքով, որ այսուհետ YouTube-ի բոլոր տեսահոլովակները հնարավոր կլինի դիտել բոլոր այն բրաուզերների միջոցով, որոնք ապահովված են HTML5 նվագարկիչով, և անհրաժեշտություն չի լինի օգտագործելու այլ ծրագրեր, օրինակ` Flash Player: WebM ֆորմատով տեսահոլովակների դիտումն արդեն ապահովված է Google Chrome, Mozilla Firefox և Opera զննարկիչների վերջին տարբերակներում:
Ներկայումս այս ֆորմատը հասանելի է բոլոր զննարկիչների համար: Պարզապես Microsoft Internet Explorer-ի և Apple Safari-ի օգտագործողները ստիպված կլինեն տեղադրել նոր փլագին: Նախկինում այս զննարկիչները առավելություն ունեին, քանի որ ապահովված էին H264 ֆորմատը վերարտադրելու հնարավորությամբ:
