«Առաջին լրատվական»-ը ներկայացնում է «Բողոք երկրի սրտից» հաղորդաշարի հերթական թողարկումը: Երկրի սրտում՝ Հանրապետության հրապարակում, իր բողոքն է հայտնում Արարատի մարզի Արբաթ գյուղի բնակիչ Սեմիզար Հարությունյանը: Նա պնդում է, որ հայտնվել է պարտքերի հսկայական հորձանուտում ՝ մեծ մասամբ այլոց մեղքով:
Տիկին Սեմիզարը բազմազավակ մայր է, ընտանիքը բաղկացած է 11 անձանցից, երկու որդիները ծառայում են հայոց բանակում:
Տիկին Սեմիզարը պատմեց, որ հարսը լքել է որդուն՝ թողնելով անչափահաս երեխաների խնամքը իր ուսերին: Նախկինում նպաստ են ստացել, երկու ամիս է կասեցրել են՝ պատճառաբանությամբ, որ աշխատող ուժ ունեն: «Սրա-նրա հողում սեզոնային գործ անելը աշխատա՞նք է, ինչ անենք, անջատել են լույսը, ջուրը, երեխաներիցս մեկը դիզբակտերիոզ հիվանդություն ունի՝ ջրերի պատճառով, չգիտեմ պարտքերը տամ, թե դեղ առնեմ, լույսը անջատել են, 70 հազար դրամից ավել պարտք է կուտակվել»,- ընդգծեց նա:
Տիկին Սեմիզարն ասաց, որ ոչ միայն լույսի պարտք պետք է վճարի, այլև 664 հազար դրամ տուգանք ջրաչափ չունենալու համար: «Ինչո՞ւ տուգանք վճարեմ, եթե ամեն ամիս պարտաճանաչ մուծել եմ 2 հազարական դրամ, անդորրագրերը կան, բացի այդ՝ լուկ չունենալու պատճառով է ջրաչափս տրաքել, լուկն էլ ես պիտի դնեմ»,- պատմեց նա:
Տիկին Սեմիզարը տեղեկացրեց, որ դիմել է գյուղապետին, վերջինս պատասխանել էր, որ բյուջե չկա: «Բա ես էդ պարտքերը ոնց կարող եմ մուծել , հիվանդ թոշակառու կին եմ»,- պարբերաբար կրկնում էր տիկինը:
Նա ասաց, որ օգնության համար նամակով պատրաստվում է դիմել վարչապետ Հովիկ Աբրահամյանին, քանի որ վերջինս միշտ ասում է, որ սոցիալապես անպահով մարդկանց պետությունը պիտի աջակցություն ցուցաբերի: «Օդի խոսքեր է, ոչինչ չեմ տեսնում, հետո էլ ասում են ինչո՞ւ երեխաներ չեն ունենում, ունենան ոնց պահեն: Պարոն վարչապետ, խնդրում եմ ինձ օգնեք, չգիտեմ գեղարվեստական ինչ խոսքեր գտնեմ ասեմ, որ ձեր համար շատ լավ հնչի, օգնեք»,- դիմեց տիկինը:
Մանրամասները՝ տեսանյութում:
