«Առաջին լրատվական»-ը ներկայացնում է «Բողոք երկրի սրտից» հաղորդաշարի հերթական թողարկումը:
Հանրապետության հրապարակում իր բողոքն է արտահայտում Երևանի բնակչուհի Նինել Խաչատրյանը: Նա պնդում է, որ տեգրոջ որդին իրենց 5 հոգանոց ընտանիքին խարդախությամբ փորձում է վտարել Բուռնազյան 129 հասցեում գտնվող տնից: Նա պատմեց, որ 3 տարի առաջ նամակ են ստացել, որում նշված է եղել, որ պետք է լքեն տունը, քանի որ այն պատկանում է տեգրոջ որդուն՝ Արմեն Հարությունյանին: Հետագայում պարզվել է, որ 1989 թ.-ին կտակ է եղել, բայց դրա մասին իր ամուսինը և ընդհանրապես ոչ ոք չի իմացել, այն օրինական ուժի մեջ չի մտել, չի վավերացվել սահմանված ժամկետում.
«23 տարի անց ցանկացել է 1951թ.-ից այդ տանն ապրող հորեղբորը և նրա ընտանիքին վռնդել: Նոտար Էմմա Շաբոյանի միջոցով անօրինական կերպով 23 տարի անց օրինականացրել են այն»,- մանրամասնեց տիկինը:
Գործը հասել է դատարան. «Երեմ Եսոյանը այնպիսի դատ անցկացրեց՝ զարմանալու էր. մեզ ոչ ոքիս ոչ մի բառ չհարցրեց, մենք կարծես հյուր լինեինք նստած, 3 նմանատիպ դատից հետո կայացվեց մեզ վտարելու որոշում»:
Նինել Խաչատրյանի դուստրը՝ Լուսինե Հարությունյանը, մանրամասնեց, որ վճիռը բողոքարկել է, Վերաքննիչը մասամբ հայցը բավարարել է, բայց կտակը թողել է օրինական ուժի մեջ, այնուհետև դիմել են Վճռաբեկ, հայցը բավարավել է, ուղարկվել առաջին ատյանի դատարան, սպասում են դատական առաջին նիստի կայացմանը:
Լուսինե Հարությունյանի խոսքով ՝ հորեղբոր որդին պարբերաբար սպառնում է, փորձում սահմանափակել իրենց իրավունքները տան մասով՝ չնայած նրան, որ իրենք են տունը շենացրել, վերանորոգել, տարիներ շարունակ հարկեր վճարել. «Սպառնում է իր քավորով՝ Արշակով, որ ոստիկանապետի ախրաննիկն է, ասում ա՝ ես ամեն ինչ կանեմ, կհասնեմ իմ ուզածին, Վովա Գասպարյանն իմ թիկունքին է»:
Մանրամասները՝ տեսանյութում:
