Սյունիքի մարզի Լեռնաձոր համայնքում ընթացող ուրանի պաշարների որոնման աշխատանքները հակազդեցություն են առաջացրել տեղի բնակչության շրջանում, որոնք պատրաստվում են բողոքի հանրահավաք անցկացնել դրա դեմ: Ըստ հայաստանյան գործակալությունների` ստեղծվել է այդ գործընթացի դեմ հանդես եկողների նախաձեռնող խումբ, որը հանդես է եկել կոչ-հայտարարությամբ. «Ոչ մեկիս համար գաղտնիք չէ, որ ուրանի հանքավայրի շահագործումը մահացու վտանգ է պարունակում տարածաշրջաննի բնակչության համար:
Նոյեմբերի 11-ին, ժամը 17:00 Կապանի մշակույթի պալատի հարակից հրապարակում տեղի կունենա խաղաղ եւ արտոնված հանրահավաք մեր տարածաշրջանում թափառող ուրանի ուրվականի վերաբերյալ: Հարգելի՛ բախտակից հայրենակիցներ, կոչ ենք անում Ձեզ հաղթահարել վախի եւ անտարբերության մթնոլորտը եւ մասնակցել 2010թ. նոյեմբերի 11-ին ժամը 17:00 Կապանի մշակույթի պալատի հարակից հրապարակում կայանալիք խաղաղ եւ արտոնված հանրահավաքին եւ ոչ ասել ուրանի ուրվականին»,-ասված է կոչ-հայտարարության մեջ:
