«Ա1+»-ի հիմնադիր «Մելտեքս» ՍՊԸ նախագահ Մեսրոպ Մովսիսյանը այսօր լրագրողների հետ հանդիպման ժամանակ, անդրադառնալով առաջիկա մրցույթին, նշել է, որ իրենց մրցակից «Արմնյուզը» մրցույթին ներկայացրել է մի փաթեթ, որը շատ նման է հեքիաթի: Ըստ նրա`այն, ինչ ներկայացնում է «Արմնյուզը» «Եվրոնյուզին» տրված վերահեռարձակման կապուղի է, որը ինչ-որ ժամեր հատկացնում է «Արմենիայի» տեխնիկական բազայով եւ աշխատակազմով աշխատող«Արմնյուզին»: Նա զարմացած է, որ Ամալյանի ղեկավարած հանձնաժողովը դրա վրա ուշադրություն չի դարձնում, հակառակը, մեծ տեղ է տալիս: Իսկ խախտումները հենց վկայում են այն մասին, որ կա «Ա1+»-ին կրկին կապուղի չտրամադրելու քաղաքական որոշում, ինչն էլ իր հերթին նշանակում է վերստին վերադարձ դատարան, վերադարձ սանկցիաների: Նրա խոսքերով, մրցույթը շատ լավ պատրվակ է եւ լավ շանս՝ անցյալի կեղտից մաքրվելու համար:
Երկու տարի առաջ եւ հետո ի՞նչ առաջընթաց խոսքի ազատության ուղղությամբ, Մեսրոպ Մովսիսյանը նշում է, որ եթե առաջ շատ կոպիտ միջամտություններով էին հարցերը լուծվում, հիմա դաշտը տանում են մոնոպոլիզացիայի, եւ եթե նախկինում Ռոբերտ Քոչարյանի օրոք խնդիրը երկկողմանի էր (կար ե՛ւ անձնական, ե՛ւ քաղաքական մոտեցում), հիմա Սերժ Սարգսյանի օրոք անձնականը դուրս է գալիս, մնում է քաղաքականը:
