Ռուսաստանի ազատ ոճի ըմբշամարտի հավաքականի գլխավոր մարզիչ Ջամբուլաթ Տադեևը Ցխինվալով անցնելու ժամանակ հայհոյել է տեղի բնակիչներին, ու նրա մեքենայից կրակոցներ են արձակվել: Այս մասին հաղորդում է osinform.ru-ն։ Մեքենայում են եղել նաև Ռուսաստանի ըմբշամարտի ֆեդերացիայի նախագահ Միխայիլ Մամիաշվիլին և Հարավային Օսիայի նախկին պաշտպանության նախարար Անատոլի Բարանկևիչը:
Դեպքը տեղի է ունեցել երկուշաբթի երեկոյան և մեծ աղմուկ է բարձրացրել թե՛ մարզական, թե՛ քաղաքական շրջանակներում:
Մամիաշվիլին արդեն հայտարարել է, որ այդ ամենը Հարավային Օսիայի ՆԳՆ-ի կազմակերպած սադրանքն է եղել: РИА Новости հետ զրույցում նա ասել է հետևյալը. «Մոտ 300 մետր հեռանալուց հետո 7 մեքենաներ կտրեցին մեր մեքենաների շարասյան ճանապարհը: Նրանցից իջան զինվորական համազգեստով 40-50 մարդ, որոնց մեծ մասը դիմակներով էր: Այնուհետև լսվեցին բազմաթիվ անկանոն կրակոցներ, և այդպես՝ 5-7 րոպե: Մենք դուրս եկանք մեքենաներից ներկայացրինք մեր փաստաթղթերը, և երբ նրանք ոչ մի մեղադրանք չներկայացրին մեզ, նստեցինք մեքենաներն ու հեռացանք»:
Սակայն Հարավային Օսիայի ՆԳՆ-ն բոլորովին այլ կերպ է ներկայացնում այս ամենը: Նրանց հավաստմամբ, Ջամբուլաթ Տադեևը և ռուս մարզիկները հայհոյել են ոստիկաններին ու մեքենաներից կրակոցներ են արձակել ոստիկանների ուղղությամբ: