«Արդար Ռուսաստան» կուսակցության նորընտիր նախագահ Նիկոլայ Լևիչևը Газета.Ru կայքին տված հարցազրույցի ժամանակ հայտարարել է, որ Սերգեյ Միրոնովի այս պաշտոնից հեռանալը ամենևին կապված չէ կուսակցության նոր, ավելի հզոր առաջնորդի հայտնվելու հետ, այդ թվում նաև` նախագահ Դմիտրի Մեդվեդևի հետ:
Պատասխանելով լրագրողի հարցին, թե արդյո՞ք դա նշանակում է, որ Միրոնովը տեղն ազատել է «քաղաքական ծանրակշիռ» գործիչների համար, Լևիչևը պատասխանել է. «Դմիտրի Անատոլիի Մեդվեդևը, որքան ես գիտեմ, անկուսակցական է: Նա ժամանակ ունի մտածելու՝ անդամագրվե՞լ որևէ կուսակցության, թե՞ ոչ: Ես նրա փոխարեն դեռ որևէ կուսակցություն չէի մտնի: Դրանից հետո կտեսնենք, թե ինչպես նրա ճակատագիրը կդասավորվի»:
Ըստ կայքի` կուսակցությունում ունեցած աղբյուրների՝ Միրոնովի հեռանալը կապ ունի ոչ թե խորհրդարանական ընտրությունների, այլ 2012 թ. կայանալիք նախագահականի հետ, քանի որ կուսակցությունը ներկայիս նախագահ Դմիտրի Մեդվեդևին կառաջադրի երկրորդ ժամկետի համար:
Ինքը` Սերգեյ Միրոնովը, անուղղակիորեն հաստատել է այս վարկածը՝ ևս մեկ անգամ հիշեցնելով լրագրողներին կուսակցության պաշտոնական դիրքորոշումը. «Արդար Ռուսաստանը» չի պաշտպանելու «Եդինայա Ռոսիյա» կուսակցության կողմից առաջադրված թեկնածուին»:
Լևիչևը նշել է, որ կուսակցությունում հզոր առաջնորդի հայտնվելու պարագայում պատրաստ է վայր դնել իր լիազորությունները:
«Ես չեմ կառչում իմ զբաղեցրած դիրքից, քանի որ գիտեմ, որ երկուս ու կես տարի հետո, երբ լրանան իմ լիազորությունները, կկայացվի ժողովի ուրիշ որոշում, և ես այն կընդունեմ: Միևնույն ժամանակ կարող եմ ասել, որ այն խոսակցությունները, թե կուսակցությունը պատրաստվում է նոր մարդու հայտնվելուն, ընդամենը խոսակցություններ են», – ավելացրել է Լևիչևը:
