Google-ը մտադիր է արգելափակել Facebook սոցիալական ցանցի եւ այլոց հասանելիությունը իր օգտատերերի տվյալներին: Մասնավորապես, ինտերնետ-հսկան նախատեսում է արգելել այլ ծառայություններին ավտոմատ կերպով կոնտակտներ ներմուծել gmail.com էլ.փոստից: Reuters-ի տեղեկացմամբ, ընկերությունում գտնում են, որ այդպիսի կայքերը, մասնավորապես Facebook-ը, իրենց օգտատերերին «տեղեկատվական փակուղու» առաջ են կանգնեցնում եւ պահանջում են տվյալների երկկողմանի փոխանակում:
Google-ի ներկայացուցիչները նշել են, որ արգելքը չի հանվի այնքան ժամանակ, քանի դեռ այդ կայքերը չեն տրամադրում տվյալների համանման արտահանման հնարավորություն:
Գրեթե 500 մլն օգտատեր ունեցող Facebook-ը ներկայումս օգտագործում է Gmail-ը, որպեսզի օգնի նոր գրանցվածներին գտնել արդեն գրանցված ընկերներին, ինչպես նաեւ գրանցվելու հրավեր ուղարկել Google-ում գրանցված բոլոր նրանց, ովքեր դեռեւս այդ բանը չեն արել: Այսպիսով, Gmail-ը որոշիչ նշանակություն է ունեցել Facebook-ի կայացման եւ աճի մեջ:
Google-ն իր հերթին այս քայլով ցանկանում է հասանելիություն ունենալ Facebook-ի տվյալներին` այդպիսով ուժեղացնելով իր ծառայությունները սոցիալական բաղադրիչով:
Այս արգելքը, փորձագետների կարծիքով, ավելի է ընդգծում որոնողական եւ սոցիալական գերհսկաների միջեւ առճակատումը, որը հետագայում էլ ավելի խորացման միտում ունի:
