Dayly Sabah-ի փոխանցմամբ՝ Թուրքիայի հայ համայնքը ձգտում է կրոնի քննություններում հասնել փոփոխությունների, քանի որ իսլամի վրա շեշտը դնող «կրոն» առարկայի քննությունը մարտահրավեր է Թուրքիայի հայ աշակերտների համար։
Նախորդ տարի նախնական դպրոցից միջնակարգ դպրոց ընդունվելու քննական հարցերում առաջին անգամ ընդգրկվեցին հուդայականության մասին հարցեր՝ նախատեսված հրեա աշակերտների համար։ Այժմ այդպիսի հնարավորություն կարող են ստանալ հայ աշակերտները. հայ համայնքը տվյալ խնդրի շուրջ բանակցում է Թուրքիայի կրթության նախարարության հետ։
Ակնկալվում է, որ կրոնական մշակույթի ու բարոյագիտության դասընթացներում, որոնցում շեշտը դրվում է իսլամի վրա, հաջորդ տարի կներառվեն նաև քրիստոնեությանն առնչվող հարցեր։ Այդ համատեքստում հայկական դպրոցների 8-րդ դասարանի աշակերտները կստանան նոր դասագրքեր՝ քննությանը նախապատրաստվելու համար։ Հայկական, հունական ու հրեական դպրոցների աշակերտները շարունակ դժգոհում էին, որ քննության ժամանակ պահանջում են պատասխանել իսլամի մասին հարցերին։ Թուրքիայում ոչ մուսուլմանական համայնքները վաղուց դասվում են «երկրորդ տեսակի» մարդկանց շարքին։ Դրական որոշակի փոփոխություններ գրանցվել են 2002 թվականին Թուրքիայում «Արդարություն ու զարգացում» կուսակցության (ԱԶԿ) իշխանության գալուց հետո։
