Ադրբեջանը կարող է դառնալ Եվրասիական տնտեսական միության անդամ միայն այն դեպքում, երբ ամբողջությամբ ընդհատվի նրա մերձեցումը Եվրոպական միության հետ: «Ռեգիոն» հետազոտական կենտրոնի կազմակերպած առցանց ասուլիսի ընթացքում նման տեսակետ հայտնեց գերմանաբնակ քաղաքագետ Ալեքսանդր Ռաարը:
Նրա կարծիքով՝ Ադրբեջանի համար հետաքրքիր կարող է լինել նոր էներգակիր շուկան, որը ստեղծվում է Ռուսաստանի և Չինաստանի հետ, և որին միանում է ողջ Կենտրոնական Ասիան և հնարավոր է նաև՝ Հնդկաստանն ու Պակիստանը:
Քաղաքագետն անդրադարձավ նաև ղարաբաղյան հակամարտության կարգավորմանը: «Առաջին լրատվական»-ի այն դիտարկմանը, թե Ռուսաստանի արտգործնախարար Սերգեյ Լավրովը վերջերս հայտարարել է, որ ղարաբաղյան հակամարտոթւյան կարգավորումը Մոսկվայի համար առաջնահերթություն է, իսկ Մինսկի խմբի ամերիկացի համանախագահ Ջեյմս Ուորլիքն իր հերթին հակամարտության կարգավորումն անհնար է համարում առանց Ղարաբաղի կարգավիճակի հստակեցման, և հարցին՝ հնարավո՞ր է մոտ ապագայում կարգավորման ուղղությամբ ռեալ առաջընթաց գրանցվի, Ալ. Ռաարը պատասխանեց. «Հարցն այն է, թե այս կամ այն երկրի տարբեր գործիչներ ինչ են հասկանում «կարգավորում» ասելով: Կարծում եմ՝ Արևմուտքը հետաքրքրված է, որ այս տարածաշրջանում նոր պատերազմ թույլ չտա: Ռուսաստանի հետաքրքրությունը՝ չկռվել ոչ դաշնակից Հայաստանի հետ, ոչ էլ գործընկեր Ադրբեջանի»:
Նրա գնահատմամբ՝ ներկայիս ստատուս քվոն գործընթացի մասնակիցների մեծ մասին ձեռնտու է:
Քաղաքագետն ավելացրեց, որ հակամարտությունը պետք է կարգավորվի միջազգային սկզբունքներին համաձայն: «Սակայն դժվարությունն այն է, թե միջազգային որ սկզբունքն է ավելի կարևոր՝ տարածքային ամբողջականությո՞ւնը, թե՞ ազգերի ինքնորոշումը»:
Հետաքրքրվեցինք նաև, թե հնարավո՞ր է Իրանն ապաշրջափակումից հետո ներգրավվի ղարաբաղյան կարգավորման գործընթացին, ինչին ի պատասխան՝ քաղաքագետն ասաց, որ չի կարծում, թե ներկայիս Մինսկի խմբի ձևաչափ Իրանին հրավիրողներ լինեն. «Բացի այդ՝ Թուրքիան նույնպես չի ուրախանա Իրանի տարածաշրջանային խաղաղապահությամբ: Իրանը բավականին մեծ խնդիրներ ունի Սիրիայում, Իրաքում, հիմա նաև՝ Եմենում: Իրանական քաղաքականությունը հիմա դեպի հարավ է նայում»:
Մեր հաջորդ հարցին՝ հնարավոր համարո՞ւմ է իրանական գազը դեպի Եվրոպա Հայաստանով և Վրաստանով արտահանելու տարբերակը, Ալեքսանդր Ռաարն արձագանքեց հետևյալ կերպ. «Հետաքրքիր միտք է Իրան-Հայաստան դեպի հյուսիս գազամուղի գաղափարը։ Դրա մասին վերջերս նույնիսկ Բրյուսելում եմ լսել: Բայց ինչպե՞ս պայմանավորվել Վրաստանի հետ»:
