«Առաջին լրատվական»-ը ներկայացնում է «Բողոք երկրի սրտից» հաղորդաշարի հերթական թողարկումը: Հանրապետության հրապարակում իր բողոքն է արտահայտում Երևանի բնակչուհի Հասմիկ Հովհաննիսյանը: Նա պնդում է, որ իր խուլ ու համր մորից եղբայրը խաբեությամբ վերցրել է տունը՝ հանուն սիրուհու:
Հասմիկ Հովհաննիսյանը մանրամասնեց, որ խաբեության շղթան սկսել է նրանից, որ եղբայրը մորը՝ Նունյա Կարապետյանին, 2010թ. ասել է, թե գնում են նոտարական գրասենյակ երկրից դուրս գալու համար անհրաժեշտ փաստաթուղթ ստորագրելու, հետագայում պարզվել է, որ մոր ստորագրածը նվիրատվության փաստաթուղթ է եղել:
«Սվետլանա Բադիրյանը, խախտելով նոտարական գործունեության մասին կանոնները, առանց թարգմանիչ ապահովելու, առանց վկաների կատարել է նվիրատվության գործարքը՝ խուլ ու համր մորս դուրս թողնելով սեփական տնից»,- մանրամասնեց նա:
Հետագայում որդին մորը պարտադրել է տանից դուրս գալ և տեղափոխվել ծերանոց: Գործը հասել է դատարան, և առաջին ատյանի դատարանը վճիռ է կայացրել հօգուտ խուլ ու համր կնոջ, սակայն վճիռը բեկանվել է Վերաքննիչ դատարանի կողմից, գործը հիմա գտնվում է Վճռաբեկ դատարանում:
«Ամեն քայլի կաշառակերություն է, ոնց կարող էր Վերաքննիչի դատավորը անմարդկային, անօրինական որոշում կայացնել, վերջապես արդարություն կա»,- ասաց Հասմիկ Հովհաննիսյանը:
Մանրամասները՝ տեսանյութում:
