Թուրքական Ntvmsnbc կայքի փոխանցմամբ, Ֆրանսիայի Սենատի Սահմանադրական հանձնաժողովը մերժել է Հայոց ցեղասպանության հերքումը քրեականացնող օրինագիծը:
Սահմանադրական հանձնաժողովի անդամ Ժան Ժակ Հյեսթը հիշեցրել է, որ Ֆրանսիան Հայոց ցեղասպանությունը պաշտոնապես ճանաչել է 2001 թվականի հունվարի 29-ին և հավելել.
«Հայոց ցեղասպանությունը հերքողների համար պատժաչափ սահմանող նոր օրենքը կարող է հարուցել մի շարք խնդիրներ: Այն չի համապատասխանում հանցավորություններին ու պատիժներին առնչվող սահմանադրական սկզբունքներին: Ի տարբերություն Հոլոքոսթի, Հայոց ցեղասպանության հարցում գոյություն չունի իրավական ուժ ունեցող միջազգային փաստաթուղթ:
Հայոց ցեղասպանությունը հերքողներին քրեական պատասխանատվության ենթարկելը հակասում է խոսքի ազատության մասին մարդու իրավունքների եվրոպական կոնվենցիային: Այդ օրինագծի հաստատմամբ Ֆրանսիան կարող է հայտնվել դժվարին իրադրության մեջ, քանի որ պատմության ընթացքում այդպիսի աղետներ վերապրած ժողովուրդները նույնպես կարող են Ֆրանսիայից պահանջել ընդունել նմանատիպ օրինագծեր»:
Հիշեցնենք, որ Ֆրանսիայի Սոցիալիստական կուսակցությունը մտադիր է մայիսի 4-ին Սենատի օրակարգ մտցնել Հայոց ցեղասպանության մերժումը քրեորեն դատապարտող մի օրինագիծ:
Վերջինիս հաստատման դեպքում Ֆրանսիայում Հայոց ցեղասպանությունը ժխտողները կստանան մինչև 5 տարվա ազատազրկում ու կվճարեն 45,000 եվրո տուգանք:
Ֆրանսիայում Հայոց ցեղասպանությունը ճանաչող բանաձևեր ընդունվել են 1998, 2000 և 2001 թվականներին: Իսկ 2006 թվականի հոկտեմբերի 12-ին Ֆրանսիայի խորհրդարանի Ստորին պալատն ընդունեց (Հոլոքոսթի նման) Հայոց ցեղասպանությունը մերժողներին պատասխանատվության ենթարկելու օրինագիծը, որը ցայժմ չի վավերացվել Սենատի կողմից: