Ադրբեջանի կառավարությունը չպետք է գործիք դառնա հրեաների նպատակների իրականացման համար, այլ պետք է կտրուկ քայլեր ձեռնարկի ադրբեջանական «Ալմա» շաբաթաթերթի նկատմամբ, որը Մուհամեդ մարգարեի վերաբերյալ վիրավորական հոդված էր հրապարակել: Այդ մասին իրանական գործակալությունների փոխանցմամբ, ուրբաթօրյա աղոթքի ժամանակ հայտարարել է Իրանի Արդաբիլ նահանգի իմամ Սեյեդ Հասան Ամելին: «Ադրբեջանի նախագահ Իլհամ Ալիեւը, երբ մասնակցում է հրեաների մշակույթի կենտրոնի բացմանը եւ իր քայլը բացատրում իբրեւ այդ երկրում ազատության եւ հանդուրժողականության դրսեւորում, ապա նմանօրինակ հակաիսլամական դրսեւորումների նկատմամբ որոշ շրջանակներ ինչո՞ւ են լռություն պահպանում»,- նշել է իրանցի հոգեւորականը: Սեյեդ Հասան Ամելիի խոսքով` Բաքվում նմանօրինակ հակաիսլամական նյութ է հրապարակվում Իրանի նախագահ Մահմուդ Ահմադինեժադի` Ադրբեջան կատարելիք այցի նախաշեմին:
«Ալմա» շաբաթաթերթի հրատարակած հոդվածի առնչությամբ իր վրդովմունքն է արտահայտել նաեւ Ադրբեջանի իսլամական կուսակցությունը, իսկ Vesti.az-ի փոխանցմամբ, դադարեցվել է «Ալմա»-ի գործունեությունը. այժմ այն թողարկվում է միայն էլեկտրոնային տարբերակով: