Ադրբեջանական Trend.az կայքի փոխանցմամբ, Վրաստանի դիրքորոշումը չի փոխվի Առևտրի համաշխարհային կազմակերպությանը (ԱՀԿ) Ռուսաստանի անդամակցության հարցում: Այս մասին հայտարարել է Վրաստանի խորհրդարանի առաջին փոխխոսնակ Միխաիլ Մաչավարիանին.
«ԱՀԿ-ին Ռուսաստանի անդամակցության հարցում վրացական կողմի պահանջները բխում են այդ կազմակերպության արմատական սկզբունքներից: Մենք Ռուսաստանի հետ բանակցություններ ենք վարում` ելնելով ԱՀԿ-ի կանոնադրության նորմերից:
Վերջիններս իրենցից ենթադրում են տնտեսական սահմանների ու մաքսային անցակետերի հարցերում դիրքորոշումների համընկնում: Այս փուլում Ռուսաստանը չի բավարարում այդ նորմերից և ոչ մեկը:
Բացի այդ, վրացական արտադրանքն արգելված է ռուսական շուկայում միայն նրա համար, որ այն վրացական է: Անթույլատրելի է, որ ԱՀԿ-ին Ռուսաստանի անդամակցության հարցը քաղաքականացվի»:
Հիշեցնենք, որ Ռուսաստանը ցանկանում է ԱՀԿ-ին անդամակցել դեռևս 1993 թվականից: Սակայն դրա հիմնական խոչընդոտը հանդիսանում է Վրաստանը:
2008 թվականի օգոստոսին տեղի ունեցած ռուս-վրացական հնգօրյա պատերազմից հետո` այս տարվա մարտի 10-ին, Ռուսաստանն ու Վրաստանն առաջին անգամ Շվեյցարիայի Բեռն քաղաքում ԱՀԿ-ին Ռուսաստանի անդամակցության շուրջ նստեցին բանակցությունների սեղանի շուրջ:
Սակայն դա ավարտվեց անարդյունք, քանի որ Ռուսաստանը Վրաստանից պահանջում է վրացական մաքսային վերահսկողության վերականգնման հարցում բանակցային գործընթաց ձեռնարկել ոչ թե իր, այլ` Աբխազիայի ու Հարավային Օսեթիայի հետ: