Այսօր Գերմանիայի կանցլեր Անգելա Դորոթեա Մերկելը (Կասներ) տոնում է ծննդյան 61-ամյակը։ Այս մասին հայտնում է Calend.ru-ն։
Մերկելը, ով դաշնային կանցլերի պաշտոնում է 2005 թվականից, ծնվել է 1954 թվականի հուլիսի 17-ին, Համբուրգում՝լյութերական պաստորի ընտանիքում։
Նա 1973-78թթ. ուսումնասիրել է ֆիզիկա Լայպցիգի համալսարանում և այնտեղ էլ հանդիպել Ուլրիխ Մերկելի հետ, ով 1977 թվականին դարձել է նրա ամուսինը։
Ուսումն ավարտելով՝ Մերկելը տեղափոխվել է Բեռլին, որտեղ 1978-90թթ. աշխատել է Գերմանիայի Գիտությունների ակադեմիայի ֆիզիկա-քիմիական կենտրոնական ինստիտուտում։
1980-ականների վերջերին Մերկելն սկսել է զբաղվել քաղաքականությամբ։ 1990 թվականին եղել է Գերմանիայի առաջին ոչ կոմունիստական կառավարության պաշտոնական ներկայացուցչի տեղակալ։ 1990 թվականի օգոստոսին մտել է Քրիստոնեա-դեմոկրատական միության կազմ և նույն տարում դարձել պատգամավոր։
Նա դարձել է Գերմանիայի պատմության առաջին կին կանցլերը։ Մերկելին հաջողվել է արագ ժողովրդականության հասնել. 2006-ի փետրվարին նրա քաղաքականությունից գոհ էր գերմանացիների 80 տոկոսը։