Անցած շաբաթ մենք տեղեկացրել էինք, որ Ռուսաստանի Դաշնության վարչապետ Վլադիմիր Պուտինը իր կուսակիցներին կոչ էր արել զերծ մնալ ընտրություններից խոսելուց, քանի որ դեռ մեկ տարի կա, սակայն այսօր նրան հավատարմության երդում է տվել «Եդինայա Ռոսիա» կուսակցության ղեկավար Բորիս Գրիզլովը:
Խոսելով առաջիկա ընտրությունների մասին՝ կուսակցության ղեկավարը, որը նաև Ռուսաստանի խորհրդարանի ստորին պալատի ղեկավարն է, հայտարարել է, որ «Պուտինն է որոշելու, իսկ կուսակցությունը նրան կաջակցի»: Նա գրեթե ողջ պատասխանատվությունը դրել է Պուտինի վրա` ասելով, թե նա ինչ էլ որոշի՝ կուսակցությունը նրան կաջակցի. «Պուտինը կուսակցության հիմնադիրն է, նրա հեղինակը, բացարձակ առաջնորդը, և այդ պատճառով այն դիրքորոշումը, որ նա կորդեգրի, անկասկած, առաջնային կլինի «Եդինայա Ռոսիա»-ի համար»,- ասել է Գրիզլովը: Հետաքրքիր է, որ Գրիզլովը բառ անգամ չասեց նախագահ Մեդվեդևի մասին:
Այս արձագանքը Գրիզլովը տվել է այն բանից հետո, երբ փոխվարչապետ Ալեքսեյ Կուդրինը Վաշինգտոնում կայացած ասուլիսի ժամանակ ասել էր, թե Մեդվեդևի և Պուտինի առաջադրման հարցը լուծվելու է «Եդինայա Ռոսիայի» ներսում, որը, փաստորեն, իրենից կներկայացնի յուրօրինակ փրայմերիզ` ներկուսակցական ընտրություն` նախագահի թեկնածուին որոշելու համար:
Ակնհայտ է, որ Ռուսաստանում լարվածությունն այս հարցի շուրջը դեռ մնում է, և «երդման» յուրօրինակ շքերթները կշարունակվեն՝ մինչև իշխանության թեկնածուն պարզ կդառնա: