Վրացական Apsny.ge կայքի փոխանցմամբ, Վրաստանի փոխվարչապետ, եվրոպական և եվրատլանտյան ինտեգրման հարցերով պետնախարար Գիորգի Բարամիձեն այսօր պաշտոնական այցով մեկնել է Բրյուսել:
Այնտեղ նա հանդիպումներ է ունենալու ԵՄ-ի ընդլայնման և եվրոպական հարևանության հարցերով եվրակոմիսար Շտեֆան Ֆյուլեի, ԵՄ-ի կրթության, մշակույթի և երիտասարդության հարցերով եվրակոմիսար Անդրուլա Վասիլիուսի, ԵՄ տրանսպորտի հարցերով եվրակոմիսար Սիիմ Կալայի և ԵՀ ներքին գործերի վարչության գլխավոր տնօրեն Շտեֆանո Մինսերվի հետ:
Բացի այդ, Բարամիձեն մի շարք հանդիպումներ է անցկացնելու միջազգային ոչ կառավարական կազմակերպությունների ներկայացուցիչների հետ, որոնց թվում են Միջազգային ճգնաժամային խումբը, Բաց հասարակության ինստիտուտը և Քաղաքական հետազոտությունների եվրոպական կենտրոնը:
Բարամիձեն մասնակցելու է Եվրոպական ժողովրդական կուսակցության կողմից կազմակերպած կոնֆերանսին ու հանդես է գալու Վրաստանի և ԵՄ-ի փոխհարաբերությունների մասին զեկույցով:
Հիշեցնենք, որ մարտի սկզբին Բարամիձեն հայտարարել էր. «Չեմ հասկանում` ինչո՞ւ է Վրաստանը ձգտում նախ անդամակցել ՆԱՏՕ-ին, մանավանդ, որ դա հնարավոր չի լինի իրագործել դեռ առնվազն 10 տարի:
Հավանական է, որ ԵՄ-ին անդամակցելն էլ նույնքան ժամանակ կպահանջի, սակայն ԵՄ-ի հետ մերձեցումն ավելի իրատեսական է զանազան ծրագրերի միջոցով: Հասկանում եմ, որ դրա պատճառն այն է, որ Վրաստանը ավելի շատ նպատակաուղղված է դեպի ԱՄՆ, սակայն ավելի տրամաբանական կլիներ ԵՄ-ին անդամակցելը:
Մենք եվրոպական արևելք ենք և մտադիր չենք Ամերիկայի ներկայացուցչությունը լինել Եվրոպայում»:
