ԱԺ «Օրինաց երկիր» խմբակցության պատգամավոր Խաչիկ Հարությունյանը թեեւ այսօրվա ասուլիսում խոստովանեց, որ նախագահի ընտրություններից հետո իրենց կուսակցության վարկանիշն ընկել է, սակայն մյուս կողմից համոզմունք հայտնեց, թե հաջորդ գումարման ԱԺ-ում ՕԵԿ-ն իր ծանրակշիռ դերն ունենալու է։ Հարցին՝ առաջիկա խորհրդարանական ընտրություններին ՕԵԿ-ն առանձի՞ն է մասնակցելու, թե՞ ընդգրկվելու է ՀՀԿ ցուցակում, ՕԵԿ-ական պատգամավորը պատասխանել է, թե առանձին են մասնակցելու. «Ես չգիտեմ՝ որտեղից է ձեր այդ հարցի հիմնավորումը, որ մենք ինչ-որ մեկի ցուցակում պետք է մասնակցենք։ Մենք ոչ մեկի ցուցակում չենք մասնակցելու»։ Ի դեպ, թեեւ Հարությունյանն ընդունեց, որ 2008թ. նախագահական ընտրություններից հետո իշխանությունների հետ կոալիցիա կազմելը որոշակիորեն ազդեց ՕԵԿ-ի վարկանիշի վրա, սակայն մյուս կողմից սկսեց մեղադրել ժողովրդին` մակերեսային ըմբռնումներ ունենալու մեջ: «Մեր ժողովուրդը մի տեսակ մակերեսի վրա է ամեն ինչի նայում, բայց արդեն անցել է բավականին տեւական ժամանակ՝ 2 տարի եւ ավելի, մարդիկ ի վերջո կարողանում են հասկանալ մեր կատարած քայլի ճշմարտացիությունը եւ կարեւորությունը»։
