Վրացական IPN կայքի հաղորդմամբ, այսօր Թբիլիսի է ժամանում ամերիկյան սենատորների պատվիրակությունը: Այն գլխավորում է սենատոր Ջոն Քայլը (Արիզոնա), պատվիրակության կազմում են գտնվում նաև սենատորներ Ջեֆ Սեշոնը (Ալաբամա), Մայքլ Կրապոն (Այդահո), Ռոն Ջոնսոնը (Վիսքոնսին):
Ամերիկյան սենատորների պատվիրակությունը հանդիպումներ է ունենալու Վրաստանի նախագահի, խորհրդարանի խոսնակի, Ազգային անվտանգության խորհրդի (ԱԱԽ) քարտուղարի, ընդդիմության ներկայացուցիչների, ԵՄ-ի դիտորդական խմբի (EUMM) և ոչ կառավարական սեկտորի հետ: Նրանք նաև կայցելեն վրաց-աբխազական շփման գիծ:
Ամերիկյան սենատորների վրացական այցը նրանց արևելաեվրոպական շրջագայության շրջանակներում է: Այդ այցի արդյունքում պետք է պարզվի, թե ԱՄՆ նախագահ Բարաք Օբամայի` Ռուսաստանի նկատմամբ ձեռնարկած «վերբեռնման քաղաքականությունն» ինչպիսի ազդեցություն է ունեցել Արևելյան Եվրոպայում ԱՄՆ դաշնակիցների անվտանգության վրա:
