Ռուսաստանի Կազան քաղաքում ընթացող ծանրամարտի Եվրոպայի առաջնությունում ավարտվեց կանանց մրցաշարը: Վերջինը ծանրաձողին մոտեցան գերծանրքաշային կարգում հանդես եկող կանայք, որոնց թվում էր նաև Եվրոպայի բազմակի չեմպիոնուհի Հռիփսիմե Խուրշուդյանը: Ինչպես և սպասվում էր, Հռիփսիմեն նվաճեց բոլոր 3 արծաթե մեդալներն ու հռչակվեց Եվրոպայի փոխչեմպիոն:
Պոկում վարժությունում հայ ծանրորդուհին կարողացավ գլխավարևում պահել 114 կիլոգրամ կշռող ծանրաձողը: Հրում վարժությունում Հռիփսիմեն բարձրացրեց 140 կիլոգրամանոց ծանրաձողը: Երկամարտի արդյունքում հայ մարզուհին ցույց տվեց 254 կգ արդյունք և երրորդ տեղը զբաղեցրած թուրք Ումմուհար Կուչարին գերազանցեց 5 կիլոգրամով:
Իսկ չեմպիոնի հարցն այս քաշային կարգում քննարկման առարկա չէ, և ոչ միայն այս մրցաշարում, այլ բոլոր այն մրցաշարերում, որտեղ մասնակցում է 20-ամյա ռուս Տատյանա Կաշիրինան, ով, օրինակ, այսօր երկրորդ տեղը զբաղերած Հռիփսիմեին գերազանցեց 72 կիլոգրավով: Կաշիրինան հերթական անգամ Եվրոպայի և աշխարհի նոր ռեկորդներ սահմանեց: Այս անգամ նա գերազանցեց բոլոր հնարավոր ռեկորդները երիտասարդների, մինչև 23 տարեկանների և մեծահասկների պայքարում, ընդհանուր առմամբ` 18 ռեկորդ:
