Վրացական medianews.ge կայքի փոխանցմամբ, «Նոր աջեր» ընդդիմադիր քաղաքական միավորման ներկայացուցիչ Մամուկա Կացիտաձեն քննադատության է ենթարկել Վրաստանի նախագահ Միխեիլ Սաակաշվիլիին` մեկօրյա PR կամպանիաների անցկացման իր քաղաքականությունը շարունակելու համար:
Հիշեցնենք, որ ապրիլի 14-ին Վրաստանում նշվում է մայրենի լեզվի տոնը, ինչի կապակցությամբ էլ Սաակաշվիլին եթերով խոստացել էր աջակցել շրջաններում բնակվող էթնիկ փոքրամասնություններին վրացերենի ուսուցման ծրագրին:
Այս կապակցությամբ Կացիտաձեն նշել է. «Եթե Սաակաշվիլիին իսկապես մտահոգում է էթնիկ փոքրամասնությունների կրթական խնդիրը և նրանց ցանկանում է սովորեցնել վրացերեն, ապա դրա համար նա 8 տարի ժամանակ ուներ, սակայն ցայժմ ոչինչ չի ձեռնարկել այդ ուղղությամբ:
Մայրենի լեզվի օրը Սաակաշվիլիի ցուցաբերած նախաձեռնությունն իրականում որևէ կապ չունի սահմանամերձ շրջաններում բնակվող բնակչությանը վրացերեն սովորեցնելու հետ: Սաակաշվիլիին բնորոշ են մեկօրյա PR կամպանիաներ անելը: Նա չի մտածում հաջորդ օրերի մասին: Փոխարենը, միայն մտածում է, թե տվյալ օրն ինչպես ծառայեցնի իրեն և օգուտներ քաղի դրանից, ինչը կարող է մի օր գրավիչ լինել վրացական հասարակության, իսկ մեկ այլ օր էլ` միջազգային հանրության համար:
Իր իշխանության 8-ամյա շրջանում նա ոչինչ չի ձեռնարկել այդ ուղղությամբ: Ապրիլի 14-ին` վրացերենի օրը, նա որոշեց հանդես գալ հեռուստաեթերով և բարձրաձայնել ոչ վրացական բնակչության լեզվական խնդրի մասին: Ապրիլի 15-ին դա արդեն գոյություն չունի, և մոռացվել է այդ թեման:
Սաակաշվիլին ապրել է մեկօրյա PR կամպանիաներով, այժմ նույնպես ապրում է դրանցով, հետագայում էլ է այդպես ապրելու:
Ինչ վերաբերում է էթնիկ փոքրամասնությունների շրջանում վրացերենի ուսուցման խնդրին, ապա դրա համար դասագրքերից բացի, պահանջվում են հատուկ ծրագրեր ու նախագծեր, քանի որ ինտեգրացման գործընթացը որոշակիորեն շաղկապված է ֆինանսական ռեսուրսների հետ»:
