Ադրբեջանցի էմիգրանտները Ադրբեջանի նախագահ Իլհամ Ալիեւին եւ նրա կնոջը պատկերող ավանակների կերպարներով բողոքի գործողություն են իրականացրել:
Ադրբեջանցի մի խումբ քաղաքական էմիգրանտներ, ավանակների հանդերձանքով, Հաագայում նոյեմբերի 5-ին բողոքի գործողություն են իրականացրել ընդդեմ ալիեւյան կլանի, Ադրբեջանում մարդու իրավունքների ոտնահարման եւ բլոգերների ու լրագրողների ձերբակալությունների։ Բողոքի գործողության կարգախոսներից մեկը եղել է «Ի՞նչ են ավանակները հասկանում քաղաքականությունից» արտահայտությունը։ Ինչպես հաղորդել է «Ազատություն» ռադիոկայանի ադրբեջանական ծառայությունը, բողոքի գործողությունը տեղի է ունեցել Հոլադիայում՝ Ադրբեջանի դեսպանատան առջեւ, եւ ցուցարարների յուրաքանչյուր 20-րդ մասնակիցն իր հանդերձանքին գրել է ադրբեջանական որևէ բարձրաստիճան պաշտոնյայի անունը, այդ թվում՝ Ադրբեջանի նախագահ Իլհամ Ալիեւի ու նրա կնոջ։
Բողոքի գործողության մասնակիցներից յուրաքանչյուրը ձեռքում մի պաստառ է պահել՝ վրան գրված իրենց կերպավորած նախարարների եւ պաշտոնյաների էությունը բանութագրող կարգախոսներ։ Ակցիայի մասնակցիները Ադրբեջանի պաշտոնական դեմքերին կոչ են արել չչարաշահել իրենց պաշտոնները, դադարել զբաղվել կոռուպցիայով եւ բարեփոխումների միջոցով ժողովրդի համար ավելի թափանցիկ դարձնել իրենց աշխատանքը։ Մասնակիցները բարձրաձայն կարդացել են որոշման տեքստը, այն հանձնել դեսպանատուն եւ ավարտել իրենց ցույցը Հաագայի միջազգային դատարանի առջեւ։ Միջոցառման կազմակերպիչները հայտարարել են, թե բողոքի նման գործողություններ տեղի են ունենալու նաեւ այլ երկրների ադրբեջանական դեսպանատների առջեւ։
