Ռուսական լրատվամիջոցները շարունակում են մեկնաբանել Երևանում էլեկտրաէներգիայի թանկացման դեմ ընթացող ցույցը: utro.ru-ն, մասնավորապես, գրում է, որ վերջին օրերին Հայաստանի մայրաքաղաքում տեղի ունեցող իրադարձությունները գնալով ավելի մեծ անհանգստություն են առաջացնում Ռուսաստանում դիտորդների շրջանում:
«Բացառված չէ, որ վերջնական արդյունքում պարզվի՝ այդ իրադարձությունների հետևում ևս արտասահմանյան ոչ կառավարական կազմակերպությունների դերն ու ձեռքն են: Մենք այդ իրավիճակին ևս շատ ուշադիր հետևում ենք»,- «Ռոսիա 24» հեռուստաալիքի եթերում հայտարարել է Ռուսաստանի Դաշնային խորհրդի միջազգային կոմիտեի ղեկավար Կոսնտանտին Կոսաչյովը:
«Յուրաքանչյուր «գունավոր հեղափոխություն» սյդպիսի իրադարձություններից է սկսվել, բայց հետո վերաճել է քաղաքական իրադարձությունների: Կարծում եմ՝ հայաստանը ևս ապահովագրված չէ այդպիսի սցենարից»,- ասել է նա:
Իսկ Ռուսաստանի Պետդումայի «Միացյալ Ռուսաստան» խմբակցության առաջին փոխնախագահ Ֆրանց Կլինցևիչն ասել է. «Ցնցվում է հենց Հայաստանը, ոչ թե մեկ ուրիշ երկիր: Արևմուտքում շատերին Ռուսաստանի և Հայաստանի ավանդաբար բարեկամական հարաբերությունները կարծես ոսկոր լինեն կոկորդում»,- ասել է պատգամավորը:
Եվ այնուամենայնիվ, հայկական իրադարձություններում ճակատագրական գիծը մինչ այս պահն անցած չէ, գրում է պարբերականը: Շատ փորձագետներ նշում են, որ չնայած բողոքի ակցիան ցրելու փորձերին՝ մասնակիցները խուսափում են քաղաքական պահանջներից: Դա որոշակի հույսեր է ներշնչում, որ իրավիճակի զարգացումը չի գնա ուկրաինական սցենարով, ասվում է հոդվածում: «Սակայն նաև ոչ մի երաշխիք չկա, որ մեկ կամ մի քանի օր հետո Երևանում Մայդանը չի սկսվի»,- գրում է պարբերականը:
Էներգառեսուրսների գնի բարձրացումը մարդկանց արդեն հրահրում է բողոքի գործողությունների, utro.ru-ին ասել է Միջազգային հարաբերությունների Մոսկվայի պետական ինստիտուտի ավագ գիտաշխատող, պատմական գիտությունների թեկնածու Լեոնիդ Գուսևը:
«Առայժմ դժվար է խոսել Հայաստանում իրադարձությունների հեռանկարների մասին,- նշել է փորձագետը:- Որքանով կարելի է դատել, բողոքողների կարգախոսները զուտ տնտեսական են: Դժգոհությունների հիմնական պատճառն էլեկտրականության թանկացումն է… Այդ գինը շատ է Հայաստանի համար և 2 անգամ թանկ է, քան հարևան Վրաստանում»:
Ըստ Գուսևի՝ առնվազն 2 լուրջ պատճառ կա, որ հայաստանյան ցույցը տնտեսական հարթությունից անցնի քաղաքականի:
«Վերջին 24 տարում, ինչ Հայաստանն անկախ պետություն է, երկրում Արևմուտքի հետ կապված շատ քաղաքական գործիչներ են հայտնվել,- ասել է Գուսևը:- Հայկական սփյուռքը հսկայական է… Եվ նրանցից շատերն Արևմուտքում զբաղեցրել են և շարունակում են զբաղեցնել բավական բարձր դիրքեր: Այսօր այդպիսի մարդիկ արդեն շատ են նաև հայկական քաղաքականության մեջ: Իսկ նշանակում է՝ ռիսկ կա, որ արևմտյան սփյուռքը կարող է աջակցել բողոքի ելույթներին»:
Մյուս կողմից՝ նշում է Գուսևը, որոշակի հանգամանքներում տվյալ սցենարը կարող է և չգործել: «Հայաստանի այսօրվա մայրաքաղաքը բավական անշուք տեսք ունի…,- նշել է նա:- Հարց է առաջանում՝ ինչն է Արևմուտքում Սփյուռքի հարուստ և ազդեցիկ ներկայացուցիչներին խանգարում օգնել իրենց հայրենիքին և գոնե կարգի բերել Երևանը»:
Լուսանկարը` PAN Photo-ի