Կառավարության նիստում վարչապետ Հովիկ Աբրահամյանն անդրադարձել է էլեկտրաէներգիայի թանկացման խնդրին՝ հայտարարելով, որ սակագինը բարձրացնելը որևէ կապ չունի ՀԷՑ-երի կառավարման արդյունավետության հետ և միաժամանակ ըստ էության փաստորեն արձանագրելով, որ սակագնի նվազում չի լինի:
Հովիկ Աբրահամյանը հայտարարել է, որ չթանկացնելը կբերի էներգետիկ շղթայական ճգնաժամի: Միաժամանակ նա հայտարարում է, որ բարձրացնելու են սոցիալապես անապահովների նպաստները ու նաև հետևելու են, որ այլ ապրանքների գների անհիմն բարձրացում չլինի:
Ըստ էության, սա նշանակում է, որ իշխանությունները Հովիկ Աբրահամյանի բերանով մերժում են Հայաստանի քաղաքացիների պահանջը, որոնք էլեկտրաէներգիայի գինը չթանկացնելու համար մի քանի օր է՝ ցույցեր են անցկացնում Երևանում և հանրապետության տարբեր քաղաքներում:
Հովիկ Աբրահամյանը ելույթ է ունենում այն ժամանակ, երբ Սերժ Սարգսյանը Բրյուսելում մասնակցում է ԵԺԿ գագաթնաժողովին, իսկ Ռուսաստանի ԱԳՆ-ն նախօրեին հայտարարություն է տարածել այն մասին, որ հավատում են Հայաստանի իշխանությունների բանականությանն ու ողջախոհությանը և ակնկալում են փոխզիջում իշխանությունների և քաղաքացիների միջև, համարելով, որ կա այդ փոխզիջման հնարավորությունը:
Եվ ահա այս ֆոնին Հովիկ Աբրահամյանի ելույթը, որում, ըստ էության, փոխզիջման մասին որևէ խոսք չկա: Համենայն դեպս, դատելով քաղաքացիների պահանջներից, Հովիկ Աբրահամյանի մատնանշած նպաստների բարձրացումն ու այլ ապրանքների գների անհիմն աճը կանխելու քայլերի մասին հայտարարությունը ոչ թե փոխզիջում, այլ, ըստ էության, ծաղր կարելի է որակել Հայաստանի քաղաքացիների հասցեին:
Այս տեսանկյունից Հովիկ Աբրահամյանի ելույթը ստեղծված իրավիճակում ուղղակիորեն վկայում է ծայրահեղ ոչ ադեկվատության մասին, որ ցուցաբերում են Հայաստանի իշխանությունները: Չի բացառվում, որ Հովիկ Աբրահամյանին Սերժ Սարգսյանը Բրյուսելից, այսպես ասած, հետախուզության է ուղարկել՝ տեսնելու համար, թե քաղաքացիները ինչպիսի արձագանք կտան նրա ելույթին, որից հետո Սերժ Սարգսյանն արդեն կասի, այսպես ասած, իր խոսքը: Ի դեպ, այս առումով նմանօրինակ ոճային նախադեպեր նա մատուցել է տարբեր հարցերում, երբ մինչև իր խոսքը ՀՀԿ-ական տարբեր գործիչներ ու պաշտոնյաներ մի բան են ասել, իսկ հետո Սերժ Սարգսյանը կայացրել է լիովին հակառակ որոշումը:
Այս տեսանկյունից չի կարելի բացառել, որ «անհարմար» վիճակում հայտնվելու հերթը Հովիկ Աբրահամյանինն է, երբ նա ասում է, որ չթանկացնել հնարավոր չէր, սակայն Սերժ Սարգսյանը կարող է հանկարծ որոշել, որ պետք է բավարարել քաղաքացիների պահանջը և կասեցնել թանկացումը:
Սրան զուգահեռ, իհարկե, հարց է նաև այն, թե ինչքանո՞վ է Հովիկ Աբրահամյանի ելույթը համաձայնեցված Սերժ Սարգսյանի հետ: Իհարկե, քիչ հավանական է, որ Աբրահամյանը նման նուրբ իրավիճակում գնար ինքնուրույն նմանօրինակ ելույթի: Սակայն բոլոր դեպքերում չպետք է բացառել նաև, որ ներկայիս ներքաղաքական իրավիճակում զարգացումները ներիշխանական համակարգում ազդեցությունների պայքարը առաջիկա նախընտրական հեռանկարների կոնտեքստում այնքան է սրվել, որ կարող են լինել նաև նմանօրինակ անձնական նախաձեռնություններ, որոնցով Հովիկ Աբրահամյանը գուցե նաև փորձում էր Մոսկվայի տրամադրությունները շոշափել նաև անձամբ իր անձի մասով:
Լուսանկարը՝ Photolure-ի