«Փայլուն և շատ լավ սերունդ է, պարզապես նոր են, և կա որոշակի անփորձություն»,- «Առաջին լրատվական»-ի հետ զրույցում նման տեսակետ հայտնեց քաղտեխնոլոգ Կարեն Քոչարյանը՝ անդրադառնալով էլէներգիայի թանկացման դեմ բողոքի ցույց անող երիտասարդներին և նրանց երեկվա գործողություններին:
Մեր զրուցակիցն ընդգծեց, որ իր կարծիքով՝ երիտասարդները սխալ գործեցին՝ Բաղրամյան 26 գնալու հրավերը մերժելով։ «Ինձ համար անհասկանալի է, թե ինչու չընդունվեց նախագահի մոտ գնալու հրավերը: Այնուամենայնիվ, Բաղրամյան բարձրանալը ինքնանպատակ չէ, և ամբողջ երեք օրվա հավաքի ընթացքում պայման էր դրված նախագահին, նախագահն էլ պատրաստ էր նրանց ընդունել»,- ասաց Քոչարյանը:
Դիտարկմանը, թե հինգ հոգին մեծ պատասխանատվություն կվերցնեին նախագահի նստավայր գնալով, Կարեն Քոչարյանն արձագանքեց. «5 հոգին ընդամենը լինելու էին փոստատարի դերում: Գնալու էին հավաքվածների պահանջը ներկայացնելու նախագահին և նրանց էլ փոխանցեին նախագահի ասածը: Դրանից հետո՝ եթե ընդունվեր ասածը, եթե փոխզիջման գային՝ շատ լավ, եթե ոչ՝ ամբողջ պատասխանատվությունը կընկներ իշխանությունների վրա: Գոնե ինչ-որ առումով կհասկանային՝ ումից են պահանջում՝ Բիբինի՞ց, Նազարյանի՞ց, թե՞ Սերժ Սարգսյանից»,- ասաց քաղտեխնոլոգը՝ հավելելով, որ երեկվա բախման հիմնական սխալը եկել է այդտեղից:
Կարեն Քոչարյանը ընդգծեց՝ ամենամեծ խնդիրն այն է, որ հասարակության մեջ կա ապատիա. «Կա խնդիր, որ վերաբերում է բոլորին, բայց, չգիտես ինչու, այդ խնդրով զբաղվում է 4000 մարդ: Սա է մեր ժողովրդի ամենամեծ խնդիրը: Բոլորը փորձում են ինձ կամ մյուս երիտասարդներին մեղադրել՝ ասելով, թե ինչո՞ւ սա չասացիր, ինչո՞ւ այնպես չարեցիր. իսկ դու ինչո՞ւ չես գալիս: Տանը նստել ու բողոքել, ընտրություններին 5000 դրամ վերցնել, հետո բողոքել՝ ինչո՞ւ է այսպես վատ»:
Նրա խոսքերով՝ եթե ամեն մարդ խնդիրը փնտրի իր մեջ, ապա այդ խնդիրը անպայման լուծում կստանա: