«Իշխանությունները որակական առումով 2000 թվականից սկսած առ այսօր որևէ փոփոխություն չեն ունեցել: Կեղծ են այն ակնկալիքները, որ այս անգամ իշխանությունը պետք է ավելի բարի լինի, քան, ասենք, 2003-ի ապրիլի 12-ին»,- «Առաջին լրատվական»-ի հետ զրույցում ասաց «Հանրապետություն» կուսակցության նախագահ Արամ Սարգսյանը՝ անդրադառնալով այսօր առավոտյան էլեկտրաէներգիայի թանկացման դեմ բողոքող ակտիվիստների նկատմամբ ոստիկանության կիրառած բռնություններին ու հատուկ միջոցներին:
Սարգսյանի խոսքով՝ ակտիվիստների գործողությունները պետք է հստակ պլանավորված լինեն, որպեսզի մենք ամեն անգամ նույն ճանապարհով չգնանք, այսինքն՝ որոշակի քայլերի չդիմենք, որից հետո սկսենք պայքարել քաղբանտարկյալների ազատ արձակման համար:
Սարգսյանը սխալ է համարում այն միտքը, թե քաղաքական ուժերը չպետք է խառնվեն այս պայքարին, նրանք վատն են, խոչընդոտում են: Հակառակը՝ պետք է քաղաքական պահանջ դրվի, որպեսզի հնարավոր լինի հաջողություն գրանցել: «Եթե մենք ուզում ենք փոփոխության հասնել, պետք է կարողանանք համախմբվել, պահանջին քաղաքական իմաստ և բովանդակություն տալ: Մենք պետք է քաղաքական պահանջներ դնենք, և քաղաքական իրավիճակներում ես այս իշխանություններից ազատվելու ռեալ հնարավորություն եմ տեսնում»,- ասաց Սարգսյանը:
Անդրադառնալով հարցին, թե ինչու քաղաքական ուժերից որևէ մեկը ակտիվիստների կողքին չէ, Արամ Սարգսյանը նկատեց. «Եթե գալիս ես հրապարակ ու հետո համացանցով տեսնում ես արձագանքները, թե՝ նրանք եկել են «փիառվելու», երևալու համար, ապա դա վիրավորական է: Սա հստակ սոցիալական բունտ է՝ սոցիալական 1 խնդրով, իսկ իմ ցանկացած ներկայությունը իշխանափոխություն է, հեղափոխություն: Իմ պահանջը դա է: Ես հասկանում եմ, որ եթե այսօր Սերժ Սարգսյանը նույնիսկ չեղյալ հայտարարի հոսանքի թանկացման որոշումը, ապա ինքը դրանից ավելի լավը չի դառնալու»,- ասաց Սարգսյանը՝ միևնույն ժամանակ բացառելով, որ հոսանքի թանկացման որոշումը Սերժ Սարգսյանի կողմից կչեղարկվի, քանի որ հոսանքի թանկացման խնդիրը կախված չէ ՀՀ իշխանություններից:
Հարցազրույցն ամբողջությամբ՝ տեսանյութում։
