Թուրքական Zaman թերթի փոխանցմամբ, վաղվանից ուժի մեջ է մտնելու անցագրային ռեժիմի վերացման մասին Թուրքիայի և Ռուսաստանի միջև 2010 թվականի մայիսի 12-ին Անկարայում կնքված համաձայնագիրը: Մինչ այդ երկու երկրների միջև գործում էր մեղմացված անցագրային ռեժիմ:
Դա առաջին հերթին միտված է երկու երկրների առևտրային ու զբոսաշրջային կապերի խթանմանը: Մասնավորապես նախորդ տարի Թուրքիայի ու Ռուսաստանի միջև առևտրային շրջանառությունը կազմել է 26.2 միլիարդ դոլար, մինչդեռ այժմ` անցագրային ռեժիմի վերացումից հետո, կանխատեսվում է, որ մեկ տարվա ընթացքում այդ ցուցանիշը կհասնի 40 միլիարդ դոլարի:
Նույնը վերաբերում է զբոսաշրջությանը. եթե նախորդ տարի Ռուսաստանից Թուրքիա է այցելել 3 միլիոն զբոսաշրջիկ, ապա կանխատեսումների համաձայն` այս տարի նրանց թիվը կասնի 4 միլիոնի: Ակնկալվում է, որ Թուրքիայից Ռուսաստան մեկնողների թվաքանակն էլ իր հերթին կհասնի 500.000-ի` նախորդ տարվա 300.000-ի դիմաց:
Ռուսաստանը Թուրքիայի համար կդառնա 58-րդ երկիրը, որոնց հետ չի գործում անցագրային ռեժիմը:
Այստեղ ուշագրավն այն է, որ այդ 58 երկրների թվում թուրքական ամենաազդեցիկ թերթերից մեկը նշել է նաև, այսպես կոչված, Հյուսիսային Կիպրոսի թուրքական հանրապետությունը (ՀԿԹՀ), որի անկախությունը համայն աշխարհում ցայժմ ճանաչել է միայն Թուրքիայի Հանրապետությունը: Լեռնային Ղարաբաղի պատճառով Ադրբեջանը զրկված է այդ գայթակղությունից: