Վրացական newsgeorgia.ruկայքի հաղորդմամբ, Վրաստանն ու Ադրբեջանն արդեն համաձայնեցրել են իրենց ցամաքային սահմանագծի 66 տոկոսը: Այս մասին հայտարարել է Վրաստանի փոխարտգործնախարար, սահմանագծման պետական հանձնաժողովի նախագահ Դավիթ Ջալագանիան.
«Վրաց-ադրբեջանական սահմանն ունի 480 կիլոմետր երկարություն: Սահմանագծման վերաբերյալ վրացական ու ադրբեջանական հանձնաժողովներն արդեն ճշգրտել են սահմանի 66 տոկոսը:
Դա շատ բարդ, աշխատատար և պատասխանատու գործընթաց է: Դրա համար էլ դրանում չպետք է ակնկալել ակնթարթային և սենսացիոն արդյունքեր: Կարևորն այն է, որ կողմերն օժտված են համապատասխան կամքով` սահմանագծման գործընթացն իր հաջող ավարտին հասցնելու համար:
Մնացած 34 տոկոսի հարցը կլուծվի փուլ առ փուլ` առանձին հատվածներով»:
Հիշեցնենք, որ սրանից առաջ էլ նշվում էր, թե վրաց-ադրբեջանական սահմանին կատարվել է 69 տարածքային ուղղում, որոնցից 42-ը եղել են ի վնաս Վրաստանի, իսկ 27-ը` ի վնաս Ադրբեջանի: Դրա արդյունքում Վրաստանի տարածքային կորուստները կազմել են մոտ 293 հեկտար: