Երեկ Աջափնյակում դանակահարությունից մահացած 43-ամյա տղամարդու սպանությունը բավական ծանր հարված է նրա ընտանիքի անդամների համար: Մեր տեղեկություններով, տղամարդը ամուսնացած էր, երկու երեխաների հայր: Թե ինչն է եղել սպանության պատճառը, առայժմ հայտնի չէ, հայտնի չէ նաև երեկ սպանության կասկածանքով ձերբակալվածի անձը, սակայն, կատարվածը այս ընտանիքի համար իսկական ողբերգություն է, ուստի սպանվածի հարազատները ևս սեփական ուժերով փորձում են գտնել մարդասպանին:
Ի դեպ, սպանության կասկածանքով ձերբակալվածի ինքնությունը քննչական մարմինը չի շտապում բացահայտել: Քննչական կոմիտեից «Փաստինֆո»–ի հարցմանն ի պատասխան հայտնել են, որ արդեն իսկ հայտնի է նաև սպանության շարժառիթը, բայց այն ևս չի գաղտնազերծվում՝ քննության շահերից ելնելով:
Տղամարդը մահացել է պարանոցի, կրծքավանդակի, թևերի հատվածներում դանակով հասցված շուրջ 20 վերքերից։ Ասել է թե՝ մարդասպանը ոչ միայն ուղղակի ցանկացել է սպանել տղամարդուն, այլ դա արել է առանձնակի դաժանությամբ:
Հարվածների նման քանակը կարող է վկայել կամ այն մասին, որ մարդասպանը մենակ չի գործել, և նրան միաժամանակ մի քանի հարվածներ են հասցրել տարբեր անձինք, ինչը հեշտությամբ կպարզվի դատաբժշկական փորձաքննության արդյունքում, կա՛մ մարդասպանը եղել է հուզական այնպիսի վիճակում, որ ուղղակի չի զսպել իր զոհի նկատմամբ իր ունեցած զգացմունքները:
Ի դեպ, հատկանշական է, որ դժբախտությունները, կարծես թե, հետևում են այս ընտանիքին: «Փաստինֆո»-ի տեղեկություններով, որոշ ժամանակ առաջ ավտովթարից մահացել էր նաև սպանվածի եղբայրը:
Նշենք նաև, որ սպանվածի ընտանիքը, թեև հաշվառված է Երևանում, բայց բնակվում է մայրաքաղաքին մոտ մարզային բնակավայրում: