Ազգային անվտանգության ծառայության պետի տեղակալ Արզուման Հարությունյանը «Առաջին լրատվական»-ի հետ զրույցում չհամաձայնեց, որ իր որդին բավականին երիտասարդ տարիքում հենց իր հովանավորությամբ է նշանակվել բարձր պաշտոնի: Հիշեցնենք, որ Հայկ Հարությունյանը 2014 թ. 28 տարեկանում նշանակվել է էներգետիկայի փոխնախարար: Իսկ մինչ այդ՝ 2011 թ. նա զբաղեցրել է «Մեծամորի էներգոատոմ» ՓԲԸ-ի գլխավոր տնօրենի տեղակալի, այնուհետև գլխավոր տնօրենի պաշտոնակատարի պաշտոնները:
Բացի բարձր պաշտոնից, Հ. Հարությունյանն ունի նաև պատկառելի կարողություն՝ հողամաս, բնակելի տուն, «Mercedes 350 4Matic» մակնիշի ավտոմեքենա, երեք ընկերություններում բաժնետոմսեր, երեք փոխառություն ընդհանուր (պարտքով տված գումար), ընդհանուր 104 մլն 955 հազար դրամ: Իր հայտարարագրի համաձայն` Հ. Հարությունյանն ունի նաև 19 մլն դրամ, 45 հազար դոլար և 20 հազար եվրո դրամական միջոցներ: Իսկ 2014 թ. յոթ ամիսներին՝ մինչև նշանակվելը, նրա եկամուտները կազմել են 120 մլն 920 հազար դրամ:
Եվ ահա Հայկ Հարությունյանի այս հաջողությունների մասին էլ «Առաջին լրատվական»-ը խոսեց նրա հոր՝ Արզուման Հարությունյանի հետ: Վերջինս էլ, հիշեցնենք, Սահմանադրական դատարանի նախագահ Գագիկ Հարությունյանի հարազատ եղբայրն է:
– Պարոն Հարությունյան, ինչպե՞ս է Ձեր որդուն հաջողվել այդքան երիտասարդ տարիքում ստանալ էներգետիկայի փոխնախարարի բարձր պաշտոնը և կուտակել բավականին մեծ կարողություն:
– Ուսումնասիրեք որդուս կենսագրությունը, մնացածը, համոզված եղեք, որ այնտեղ կգտնեք:
– Արդյոք Ձեր հովանավորությունը դեր չի՞ խաղացել Ձեր որդու հաջողության հարցում:
– Ոչ: Երբեք: Դրա համար էլ, խնդրում եմ, ուսումնասիրեք որդուս կենսագրությունը, և Ձեզ մոտ հարցեր չեն առաջանա: Ուսումնասիրեք, թե որտեղ է սովորել, ինչպես է սովորել, ինչ կրթություն է ստացել, որտեղ է ծառայել:
– Փաստորեն, բավականին երիտասարդ տարիքում հասցրել է միաժամանակ և՛ այդքան շատ կրթություն ստանալ, և՛ բավականին հաջողակ բիզնեսմեն լինել:
– Իհարկե, հասցրել է: Եվ դա ուսումնառության ընթացքում չի կուտակել: Աշխատանքի ընթացքում է կուտակել, ծառայությունից հետո:
– Իսկ ինչպե՞ս է ստացվում, որ պաշտոնյաների երեխաները կրթություն ստանալու հետ միասին նաև հաջողակ բիզնեսմեն են լինում:
– Պաշտոնյայի երեխա հասկացողությունն այստեղ տեղին չէ: Ուսումնասիրեք նրա կենսագրությունը և կտեսնեք, որ դեռ ավելի բարձունքների կարող է հասնել:
– Դո՞ւք եք հովանավորում, որ նա այդքան հաջողակ է:
– Ոչ, հովանավորել ասելով՝ ի՞նչ եք պատկերացնում:
– Միջնորդում եք այլ պաշտոնյաների, որ Ձեր որդուն պաշտոնի նշանակեն:
– Ոչ: Եթե նա արժանիքներ չունենա, առաջ չի գնա: Համոզված եղեք:
– Շատ ավելի արժանիքներ ունեցող երիտասարդներ կան, որոնք նման հաջողություններ չեն կարող ունենալ:
– Փնտրեք, գտեք, թող նրանք էլ առաջ գնան: Ես միայն մի հարցով եմ միջնորդել տղայիս համար, որ նա կրթություն ստանա: Նա կրթություն է ստացել և՛ Հայաստանի Հանրապետությունում՝ բավականին հաջող, և՛ արտասահմանում:
Հ.Գ. – Ա. Արզումանյանի հետ այս հարցազրույցը հաջողվեց միայն այն բանի շնորհիվ, որ նրա կանչին ի պատասխան Ազգային ժողովի վերելակն այդպես էլ չարձագանքեց: Հակառակ պարագայում նա պատրաստվում էր արագ հեռանալ ու չարձագանքել մեր հարցերին:
