Ամիսը մեկ անգամ ընթերցողին հնարավորություն ենք տալիս իրեն հետաքրքրող հարցերով դիմել Հայաստանի Հանրապետությունում ԱՄՆ հյուպատոս Ֆրենք Տուին, ում պատասխանները հրապարակվում են թերթում և մեր կայքում: Հարցերը կարող են առնչվել ԱՄՆ մուտքի վիզաներին ու ԱՄՆ ուղևորություններին: Միացյալ Նահանգները Հայաստանից ժամանած այցելուներին առաջարկելու շատ բան ունի` կարող եք ծանոթանալ ԱՄՆ պատմությանը, մշակույթին, ճաշակել ամերիկյան ուտեստներն ու գինիները, տեսնել ԱՄՆ ճարտարապետությունը, լինել ծովափնյա հանգստավայրերում ու ազգային պարկերում:
Կարող եք նաև ձեր հարցերն ուղարկել էլեկտրոնային փոստի` [email protected] հասցեով: Ստորև ներկայացնում ենք ԱՄՆ հյուպատոսին ուղղված ԱՄՆ վիզաներին ու ներգաղթային գործընթացներին վերաբերող մեր հարցերն ու նրա պատասխանները:
– Ողջույն, ես Ֆրենկ Տուն եմ, Հայաստանում ԱՄՆ հյուպատոսը: Ամեն ամիս ես պատասխանում եմ ԱՄՆ մուտքի վիզաների ու ներգաղթային գործընթացների վերաբերյալ ձեզ հետաքրքրող հարցերին: Շնորհակալ եմ մեզ ուղղած բազմաթիվ հարցերի համար: Այս ամիս շատ հարցեր ենք ստացել գործարար կամ բիզնես վիզաների վերաբերյալ, ուստի ուզում եմ խոսել հենց բիզնես վիզայի մասին:
Սա հայտնի է որպես B1 վիզա և ամենաշատ տրամադրվող վիզաներից է: Վիզայի համար դիմողների մեծամասնությանը մենք տրամադրում ենք B1/B2 վիզա, այսինքն` տուրիստական և բիզնես վիզա, որն ինչպես ձեզնից շատերը գիտեն, կարող է ունենալ մինչ 10 տարի վավերականություն:
Կարևոր է, որ «բիզնեսե եզրույթն ընկալենք հենց այն իմաստով, ինչ սահմանված է ԱՄՆ ներգաղթային օրենսդրությամբ, որին հնարավոր է, որ դուք ծանոթ չլինեք: ԱՄՆ ներգաղթային օրենքներում «բիզնեսըե և «աշխատանքըե տարբերակված են, ու ըստ այդմ՝ գորրծում են տարբեր տեսակի վիզաներ: Ինչպես ավելի վաղ նշեցի, մենք ունենք բիզնես վիզայի միայն մեկ տեսակ, մինչդեռ աշխատանքային վիզաների մի քանի տարատեսակ կա:
Հարց.- Ի՞նչ տարբերություն կա «բիզնեսի» և «աշխատանքի» միջև:
– «Բիզնեսի» և «աշխատանքի» միջև տարբերությունը որոշելիս հարկ է հաշվի առնել, թե որտեղ է բիզնես գործունեությունն իրականացվում: Բիզնեսի տեղը որոշելու համար դիտարկվում են հետևյալ գործոնները.
– որտեղ և ովքեր են վերջնական գործածողները;
– որտեղ է ապրանքը մշակվում ու արտադրվում;
– որտեղ է գոյանում շահույթ:
Եթե բիզնես գործունեությունը տեղի է ունենում ԱՄՆ-ում, ապա դրա հետ առնչվող գործողությունները որակվում են որպես «աշխատանքե և կպահանջվի աշխատանքային վիզա: Իսկ եթե բիզնեսը ԱՄՆ-ից դուրս է, այդ դեպքում պահանջվում է B1 տեսակի վիզա:
Հարց.- Կարո՞ղ եք օրինակներ բերել:
– Առավել հստակեցնելու համար նշեմ այն դեպքերը երբ կարող է տրամադրվել բիզնես վիզա.
– համաժողովների կամ առևտրային ցուցահանդեսների մասնակցելու դեպքում;
– ԱՄՆ-ից դուրս արտադրվող ապրանքների հետ կապված պատվերների ընդունման, բանակցությունների կամ պայմանագրերի ստորագրման դեպքում;
– դասախոսությամբ կամ ելույթով հանդես գալու դեպքում, եթե ամերիկյան կողմից եկամուտ կամ վարձատրություն չեն ստանում;
– մրցաշարերի կամ սպորտային միջոցառումների մասնակցող պրոֆեսիոնալ մարզիկների դեպքում, եթե ամերիկյան կողմից եկամուտ կամ վարձատրություն չեն ստանում;
– հեռանկարային ներդրողների դեպքում, եթե նրանք ուսումնասիրում են ներդրումների հնարավոր վայրերը;
– դասընթաց կամ վերապատրաստում, որ նախատեսված չէ զբաղվածություն ապահովելու համար, և որի միջոցով արտադրական արդյունք չի ձևավորվում:
Նշված բոլոր օրինակների դեպքում բիզնես վիզայի առկայությունը թույլ չի տալիս, որ տվյալ անձը մնա Միացյալ նահանգներում և խաղա, ասենք, ամերիկյան թիմի կազմում կամ վարի որևէ բիզնեսի հետ կապված աշխատանքներ ԱՄՆ-ում:
B1 տեսակի վիզայի շրջանակում նաև չի թույլատրվում.
– իրականացնել աշխատանքներ, որոնց դիմաց կատարվում է վարձատրություն կամ եկամուտ է ստացվում ամերիկյան որևէ կառույցից;
– մասնակցել «գործնական իրագործումե ներառող դասընթացների կամ աշխատանքային փորձ ձեռք բերելու համար պրակտիկա անցնել՝ թեկուզ չվճարվող;
– անցկացնել հետազոտություն, որը օգուտներ կբերի ամերիկյան որևէ հաստատության;
– իրականացնել աշխատանքներ, որոնք նախատեսված են երկու ամերիկյան կառույցների միջև առկա պայմանագրով (ԱՄՆ պատվիրատուի և ԱՄՆ մատակարարի միջև):
Հարց.- Ինչպե՞ս կարող եմ ստանալ աշխատանքային վիզա:
– Եթե նախատեսում եք Միացյալ Նահանգներում ժամանակավորապես աշխատանք կամ զբաղվածություն ունենալ կամ վարձատրվել ամերիկյան որևէ ընկերության կողմից որպես մասնագետ կամ մասնագիտական հմտություններ չպահանջող աշխատանք կատարող, ապա պետք է ստանաք ժամանակավոր աշխատողի համար նախատեսված վիզա: Նման դեպքերում ամերիկյան գործատուն պարտավոր է հնարավոր աշխատողի անունով ԱՄՆ քաղաքացիության ու ներգաղթի ծառայությանը ոչ ներգաղթային վիզայի միջնորդագիր ներկայացնել, որին պետք է կցված լինի ԱՄՆ աշխատանքի նախարարության կողմից հաստատված աշխատանքի վկայագիր:
Հուսով եմ, որ այս պարզաբանումներից հետո ձեզանից շատերն ավելի լավ պատկերացում կազմեցին այս հարցերի շուրջ: Եթե հարցեր ունեք բիզնես կամ աշխատանքային վիզաների կամ վիզաների այլ տեսակներ վերաբերյալ, խնդրում եմ դիմել ինձ, և ես սիրով կպատասխանեմ ձեզ:
