«Սուտ վրեմենի» հասարակական շարժման ղեկավար, հայտնի քաղաքագետ, ռուսական ինտեգրացիոն ծրագրերի կողմնակից Սերգեյ Կուրղինյանն արդեն մի քանի օր է՝ Հայաստանում «Ֆաշիզմը 21-րդ դարում. մարտահրավերներ և սպառնալիքներ» թեմայով քննարկումներ է անցկացնում:
Այսօր Կուրղինյանի լսարանը Հայաստանում հիմնականում պրոռուսական քաղաքականության կողմնակիցներն էին՝ պրուռուսական Դեմոկրատական կուսակցությունը, Կոմունիստական կուսակցությունը, հասարակական կազմակերպությունների ներկայացուցիչներ Ռոբերտ Ահարոնյանը, Արման Բոշյանը, այսինքն՝ այն մարդիկ, ովքեր այս ընթացքում անխնա քննադատել են Եվրոպային ու եվրոպական արժեքները և իշխանություններին հավասար արել ամեն բան, որպեսզի Հայաստանն ինտեգրվի ռուսական նախագծերին և էլ ավելի խորացնի իր կախվածությունն այդ երկրից:
Քննարկման մասնակիցները հիմնականում ստորագրում էին Կուրղինյանի ասած ամեն բառի տակ՝ քննադատում մայդանը, Արևմուտքը և վերահաստատում իրենց այն տեսակետները, որ Ասոցացման համաձանագիրը ստորագրելուց հետո Հայաստանում էլ Եվրոպայի պես օրինականացվելու և պրոպագանդվելու էին միասեռական ամուսնությունները:
Այդուհանդերձ, փորձեցինք Սերգեյ Կուրղինյանից հետաքրքրվել, թե ինքը, լինելով ռուսական ինտեգրացիոն նախագծերի ջատագով, ի՞նչ է կարծում այն մասին, որ վերջերս ակտիվ քննարկումներ են ընթանում Ադրբեջանի՝ Եվրասիական տնտեսական միությանն անդամագրվելու մասին: Մեջբերեցինք նաև վերջերս Մոսկվա կատարած Ադրբեջանի արտգործնախարար Մամեդյարովի այցն ու այն հայտարարությունը, թե Ադրբեջանը կմտածի Եվրասիական տնտեսական միությանն անդամագրվելու մասին՝ այն բանից հետո, երբ կարգավորվի գերհասունացած Ղարաբաղյան հակամարտությունը:
Սերգեյ Կուրղինյանը վրդովվեց հարցից, նշեց, որ առաջին անգամ մեզանից է լսում նման հայտարարության մասին, և Ադրբեջանի նման մտադրությունը ընդամնեը սադրանք է համարում:
«Հենց այդպե՞ս է ասվել: Ես՝ որպես ՌԴ քաղաքացի, կարծում եմ՝ դա սադրանք է: Ոչ ոք առևտրով չի զբաղվի: Այսինքն՝ ի՞նչ. դուք՝ ռուսներդ, լուծեք Ղարաբաղի հարցը, իսկ մենք կմտածենք ԵՏՄ անդամակցության մասի՞ն: Ես կարծում եմ, որ այդ հայտարարությամբ Ադրբեջանը կարծես ձեռնոց է նետել Ռուսաստանի երեսին, որովհետև հակառակ դեպքում հայտարարություններն այլ կերպ են հնչում»,- ասաց նա:
Առավել մանրամասն՝ մեր տեսանյութում: