ԱԺ-ում այսօր քննարկվել է ՀՀ քրեական օրենսգրքում փոփոխությունների նախագիծը, որով նախատեսվում է պատժի խստացում` առանձնապես ծանր հանցագործությունների համար, եւ նվազ ծանր հանցագործությունների դեպքում` պատժի նվազեցում: Նախագծի վերաբերյալ ԱԺ պատգամավոր, պետաիրավական հարցերի մշտական հանձնաժողովի անդամ Կորյուն Նահապետյանը տեղեկացրեց, որ ելնելով հարցի կարեւորությունից` հանձնաժողովը որոշել է հարցի առնչությամբ կազմակերպել խորհրդարանական լսումներ: Ավելին, ըստ նրա, արդեն իսկ աշխատանքային քննարկումներ են եղել դատախազության, դատական դեպարտամենտի եւ ԵՊՀ իրավաբանական ֆակուլտետի ներկայացուցիչների մասնակցությամբ: Եվ ներկայացված առաջարկների արդյունքում օրինագիծը էական փոփոխություններ է կրել: Պարոն Նահապետյանի գնահատմամբ` քրեական քաղաքականության օրենսդրական ապահովման առումով օրենսդրական փաթեթն ունի աննախադեպ նշանակություն:
Գլխավոր դատախազի տեղակալ Մնացական Սարգսյանը նախագծի մասին հայտարարեց, թե ներկայիս օրենսգրքում պարադոքսալ դրույթներ կան: «Օրինակ, սպանության համար ավելի մեղմ պատիժ է նախատեսված, քան թմրատրաֆիկի կամ տրաֆիկինգի համար»,- նշեց նա’ առաջարկելով խստացնել պատիժները: Առաջարկվում է քրեական օրենսգրքի 104-րդ հոդվածի 1-ին մասով որպես պատիժ սահմանել ազատազրկում ութից տասնհինգ տարի ժամկետով` նախկին վեցից տասներկուսի փոխարեն, իսկ 2-րդ մասով ազատազրկում` տասներկուսից քսան տարի ժամկետով կամ ցմահ ազատազրկում` նախկին ութից տասնհինգ տարի ժամկետով կամ ցմահ ազատազրկման փոխարեն:
Առաջարկվում է հրաժարվել հանցագործությունների կրկնակիության ինստիտուտից, որի արդյունքում գործելու է համակցության ինստիտուտը: