«Եվգենի Բիբինն առայժմ հիմնավորումներ չտվեց, ինձ թվում է, որ հետևություններ կանի: Իրենք պետք է գնան ու նորից մտորեն այդ ուղղությամբ»,- այսօր լրագրողների հետ զրույցում ասաց Հանրապետական խմբակցության ղեկավար Վահրամ Բաղդասարյանը՝ անդրադառնալով ՀԷՑ-ի տնօրենի հետ իրենց հանդիպմանը:
Այսօր հանրապետականները Հայաստանի էլեկտրական ցանցեր ընկերության տնօրեն Եվգենի Բիբինին հրավիրել էին խորհրդարան՝ ստանալու էլեկտրաէներգիայի թանկացման հետ կապված իրենց հարցերի պատասխանները: Հանդիպումը փակ էր, ներսուդուրս անող պատգամավորները հպարտանում էին, թե Բիբինին նեղն են գցել իրենց սուր-սուր հարցերով: Բայց հանդիպումից հետո այդ պաշտոնյայի հետ հնարավոր չեղավ շփվել: Հանրապետականները, ու հատկապես այդ խմբակցության ղեկավար Վահրամ Բաղդասարյանը, փախցրեցին Բիբինին դեպի Ազգային ժողովի նախագահ գալուստ Սահակյանի հարկաբաժինը: Այնտեղից միայնակ վերադարձավ Վ. Բաղդասարյանը ու Բիբինի փոխարեն լրագրողներին ինքը հարցազրույց տվեց:
Եվ հարցին, թե արդյոք էլեկտրաէներգիայի սակագինը չթանկացնելու հնարավորություն չկա, Վ. Բաղդասարյանը պատասխանեց. «Ես նախօրոք նման հայտարարություն չեմ կարող անել, քանի որ հայտը դեռ ուսումնասիրման փուլում է: Լսումների ժամանակ ինչ-որ բան արդեն պարզ կլինի»:
Իսկ «Առաջին լրատվական»-ի դիտարկմանը, թե հանրապետականները Բիբինին չե՞ն հարցրել, թե այդ ում կամ ինչի հաշվին են այդքան շքեղ մեքենաներ ու առանձնատներ վարձակալում, Վ. Բաղդասարյանը պատասխանեց, թե այդ բոլոր հարցերը քննարկվել են, և որևէ նման գնում չի կարող մտնել սակագնի մեջ: «Դա բացառված է»,- ավելացրեց նա: