Երեկ, ի դեպ, երեխաների պաշտպանության միջազգային օրը, տեղի է ունեցել փետրվարյան հանրահայտ իրադարձություններից հետո Սերժ Սարգսյանի և Գագիկ Ծառուկյանի համատեղ հայտնությունը հասարակությանը: Նրանք միասին մասնակցել են կինոթատրոնի և զվարճանքի կենտրոնի բացման արարողությանը, որտեղ հավանաբար իր բիզնես ներդրումն ունի Գագիկ Ծառուկյանը:
Այսպիսով, այն բանից հետո, երբ փետրվարին Սերժ Սարգսյանը բավական կոշտ և կոպիտ մեթոդներով ստիպեց Գագիկ Ծառուկյանին հեռանալ քաղաքականությունից, այս հայտնությունը աչքի է ընկել միանգամից եռանիշ խորհրդանշականությամբ՝ նախ այն երեխաների պաշտպանության օրն է տեղի ունեցել, հետո բացվել է կինոթատրոն ու զվարճանքի կենտրոն, և վերջապես՝ այդ կենտրոնի անունն է Հայաստան:
Այսպիսով, Սերժ Սարգսյանն ու Գագիկ Ծառուկյանը, ըստ էության, ավետել են քաղաքական դժվարին և անհաշտ ժամանակների դե ֆակտո ավարտն ու զվարճանքի և ժամանցի ժամանակների մեկնարկը: Քաղաքականության փոխարեն պետք է վայելել կյանքն ու զվարճանալ: Ահա Սարգսյան-Ծառուկյան համատեղ մեսիջը երեխաների պաշտպանության օրը: Միգուցե այս մեսիջի ենթատեքստն այն էր, որ ոչ ոք իր հնարավորություններից մեծ հավակնություններ չցուցաբերի: Թե ում են ուղղված այս մեսիջները, երևի ժամանակը ցույց կտա: Այսինքն՝ ժամանակը կպարզի՝ սրանք հասարակությա՞նը, թե՞ իշխանական որևէ խմբի կամ խմբերի ուղղված մեսիջներ էին:
Չի բացառվում, որ Սերժ Սարգսյանը սրանով փորձել է ցույց տալ, որ Գագիկ Ծառուկյանի վերջին շրջանի ակտիվացումները բարեգործական ճակատում ոչ թե նրա, այսպես ասած, քաղաքական անհնազանդության նոր դրսևորումների նախերգանք են, այլ իր կողմից լիովին վերահսկելի գործընթաց կամ գործողություն: Ունի սա քաղաքական նպատակներ, թե ոչ՝ շատ դժվար է ասել: Այսինքն՝ Սերժ Սարգսյանը պատրաստվում է քաղաքական ինչ-որ կոմբինացիաների համար խաղարկե՞լ Գագիկ Ծառուկյանին, թե՞ պարզապես օգտագործում է նրա տնտեսական պոտենցիալը երկրում առկա ծանր սոցիալ-տնտեսական խնդիրներին որոշակի լուծումներ գտնելու, պատկերը ինչ-որ առումով մեղմելու համար, դեռևս որոշակիորեն ասելը դժվար է:
Մի բան երևի թե պարզ է, որ սրանով, ըստ էության, ժամանակից շուտ ազդարարվեց, որ Ծառուկյանի մոտ իրականացվող հարկային ստուգումները, որոնց արդյունքները Հովիկ Աբրահամյանն ու ֆինանսների նախարար Գագիկ Խաչատրյանը խոստացել էին հրապարակել մայիսի վերջին և հունիսի սկզբին, ըստ էության ավարտվել են Ծառուկյանի համար առանց որևէ հետևանքների, միաժամանակ յուրօրինակ դաս լինելով նաև բոլոր հնարավոր ներիշխանական «հավակնորդներին», որոնք պատրաստվում են ընտրական ցիկլի սուր մրցակցությանը, որ զվարճանքները միանգամայն անվնաս ու անվտանգ են, ի տարբերություն քաղաքականության:
