Ադրբեջանական APA լրատվական գործակալության փոխանցմամբ, Խաղաղության խնդիրների ուսումնասիրության Ստոկհոլմի ինստիտուտի (SIPRI) պատրաստած աշխարհի ռազմական ծախսերի վերաբերյալ զեկույցում նշված է այն մասին, որ 2010 թվականին Հարավային Կովկասում պաշտպանական ծախսերի ավելացում գրանցվել է միայն Հայաստանում, իսկ հարևան Ադրբեջանում ու Վրաստանում դրանք որոշակի անկում են ապրել:
2010 թվականին Ադրբեջանի պաշտպանական ծախսերը կազմել են 1 միլիարդ 421 միլիոն դոլար, Վրաստանինը` 452 միլիոն դոլար, իսկ Հայաստանինը` 404 միլիոն դոլար:
2009 թվականի համեմատ` Հայաստանում նախորդ տարի պաշտպանության վրա ծախսվել է 45 միլիոն դոլար ավելի, իսկ ահա Ադրբեջանում ու Վրաստանում` համապատասխանաբար 52 և 152 միլիոն դոլարով ավելի քիչ:
SIPRI-ի տվյալներով, 2000-2010 թվականներին Ադրբեջանն ընդհանուր առմամբ պաշտպանական ոլորտին հատկացրել է 9 միլիարդ 215 միլիոն դոլար, Վրաստանը` 4 միլիարդ 317.6 միլիոն դոլար, իսկ Հայաստանը` 2 միլիարդ 630 միլիոն դոլար:
Նշվում է, որ այդ թվերի մեջ հաշվի են առնված միայն պետբյուջեից պաշտպանական ոլորտին հատկացված գումարները:
Հիշեցնենք, որ նույն աղբյուրի հաղորդմամբ` նախորդ տարի Թուրքիայի պաշտպանական ծախսերը կազմել էին 15 միլիարդ 364 միլիոն դոլար (2009 թվականին` 16 միլիարդ 302 միլիոն դոլար):
