Ամասիայի ու Աշոցքի գյուղացիները կրկին ահազանգ են հնչեցնում կաթի մթերումների հարցի շուրջ։ Այսօր նրանք հավաքվել էին Աշոցքի կենտրոնում և պնդում էին, որ մթերող ընկերությունները հիմա էլ հրաժարվում են կաթ գնել Չեռնոբիլից Հայաստան ներկրված կաթի փոշու քանակի և գնի պատճառով. «Մթերողների համար կաթի փոշին ավելի ձեռնտու է, էլ ինչի՞ պիտի կաթը մեզանից 160-ով մթերեն»:
Գյուղացիների պնդմամբ՝ մթերողներն իրենց ասել են, որ հունիսի 1-ից կաթը կարող են մթերել միայն 80 դրամով:
Այս պահին Աշոցքի տարածաշրջանում են ՀՀ գյուղատնտեսության նախարարի տեղակալներ Գրիշա Բաղիյանը և Ռոբերտ Մակարյանը, Կաթնամթերք արտադրողների միության նախագահ Խաչիկ Պողոսյանը: Խաչիկ Պողոսյանը «Առաջին լրատվական»-ի հետ զրույցում ասաց, որ իրենք ուսումնասիրում են խնդիրները, նաև վստահեցրեց, որ կաթը 80 դրամով գյուղացիներից չեն մթերելու, հունիսի 1-ից 1կգ-ի համար 3.6 տոկոս յուղայնությամբ կաթը սահմանված է 130 դրամ. «Գնանկումը սեզոնային է, ոչ թե 160-ից է 130 դառնում, այլ 150-140-ից»,- նշեց նա՝ պնդելով, որ խնդիրը պահում են ուշադրության կենտրոնում:
Նա նաև ընդգծեց, որ գյուղացիների շրջանում կան մարդիկ, որոնք միտումնավոր խառնակչություն են ստեղծում՝ 80 դրամով մթերումների վարկածը տարածելով: Նա նաև պնդեց, որ ուռճացված են կաթի փոշու օգտագործման ծավալների մասին խոսակցությունները։
«Ավելին՝ հիմա կառավարությունը քննարկում է, որպեսզի չոր կաթ Հայաստան չմտնի»,- եզրափակեց նա: