«Այնպիսի հզոր պայթյուն էր, որ անհնար էր՝ մարդ չտուժեր: Լավ է, որ գիշերվա ուշ ժամ էր, թե չէ հնարավոր էր՝ ավելի շատ մարդ տուժեր: Սա չարյաց փոքրագույնն էր»,- «Առաջին լրատվական»-ի հետ զրույցում ասաց Չարենցավանի քաղաքապետ Հակոբ Շահգալդյանը՝ անդրադառնալով երեկ ուշ երեկոյան Չարենցավան քաղաքում տեղակայված գազալցակայանի պայթյունի դեպքին: Չարենցավանի քաղաքապետն ասաց, որ ինքը դեպքի վայրում է եղել:
Ինչ վերաբերում է վարկածներին, ապա քաղաքապետն ասաց, որ այս պահին դրա մաիսն խոսել հնարավոր չէ: «Դեպքի վայրում էին ԱԻՆ համապատասխան ծառայությունը, քննչական մարմինները, ոստիկանությունը, և նրանք էլ կպարզեն, թե ինչն է եղել պատճառը»:
«Առաջին լրատվական»-ի տեղեկություններով՝ Չարենցավանի նշված գազալցակայանը պատկանում է գործարար, «Ֆլեշ» ընկերության սեփականատեր Բարսեղ Բեգլարյանին:
Քաղաքապետ Շահգալդյանը մեզ հետ զրույցում ասաց, որ ինքը չգիտի, թե գազալցակայանի իրական տերն ով է, սակայն այն գրանցված է նախկին պատգամավոր Ռուբեն Թովմասյանի որդու՝ Ռոբերտ Թովմասյանի անունով: «Ռուբեն Թովմասյանի որդու անունով է ընկերությունը, բայց թե այն իրականում ում է պատկանում, ով է դրա իրական սեփականատերը, ես չգիտեմ: Անուններ չեմ լսել»,- ասաց մեր զրուցակիցը:
Նշենք, որ այս գազալցակայանը տեղակայված է քաղաքի գրեթե կենտրոնում՝ Եսայան փողոցում: Մինչդեռ օրենքը հստակ սահմանում է, թե գազալցակայանները բնակելի տարածքներից որքան հեռավորության վրա պետք է կառուցվեն:
Ի դեպ, նախօրեին ՏԿԱԻ նախարար Արմեն Երիցյանն «Առաջին լրատվական»-ի հետ զրույցում ասել էր, որ հստակ հանձնարարական ունի ստուգումներ և դիտարկումներ անցկացնելու գազալցակայանում, և եթե պարզվի, որ դրանք կառուցված են օրենքի խախտումներով, թերացումներ կան, ապա դրանց շահագործումը կդադարեցվի: Նախարարը նաև հավաստիացրեց, որ իր համար նշանակություն չունի, թե ովքեր են այդ գազալցակայանների իրական սեփականատերերը:
Հիշեցնենք, որ դեպքը տեղի է ունեցել երեկ՝ ժամը 23:54-ին, Կոտայքի մարզի Չարենցավան քաղաքի 4-րդ թաղամասի Եսայան փողոցի թիվ 10 հասցեում գտնվող «Դռայվ 2014» ՍՊԸ-ին պատկանող գազալցակայանում «ՎԱԶ-2101» մակնիշի 34SM551 պետհամարանիշով ավտոմեքենայի գազի լիցքավորման ժամանակ: Պայթել էր գազի բալոնը, ինչից տեղում մահացել է գազալցակայանի աշխատակից: Մեկ այլ քաղաքացի տեղափոխվել է հիվանդանոց և բուժօգնություն ստանալուց հետո դուրս գրվել:
Նշենք, որ այս պայթյունը մայիս ամսին 4-րդ դեպքն է: