«ՀԱԿ-ը մինիմում պահանջներ է դրել, որպեսզի երկրում անցնցում, չվնասելով Ղարաբաղի հարցը, իրական ընտրություններով իշխանությունը հանձնվի ժողովրդին, ինչը վերջին 12 տարիներին չի եղել, և դա է վկայում նաև ԱՄՆ պետդեպարտամենտի վերջին զեկույցը, որում նշված է, որ 2008 թ. Սերժ Սարգսյանը ընտրվել է կեղծիքներով, ինչը նշանակում է, որ չի ընտրվել»,- ընդգծեց «Ժողովրդավարական հայրենիք» կուսակցության նախագահ, ՀԱԿ անդամ Պետրոս Մակեյանը:
Անդրադառնալով ընդդիմադիր դաշտի հակասություններին՝ Մակեյանը նշեց, որ ընդդիմությունը միասնական է՝ ի դեմս Հայ ազգային կոնգրեսի, իսկ այն ընդդիմությունը, որը խանգարում է իշխանությունը ժողովրդին հանձնելուն` ընդդիմություն չէ:
ՀՀԿ-ական Համլետ Հարությունյանն էլ ողջունեց Լևոն Տեր-Պետրոսյանի քաղաքական հեռատեսությունը և պետական գործչին վայել քաղաքական գործընթացներ վարելու արվեստը: Հարությունյանը նշեց, որ մենք ունենք շատ յուրահատուկ աշխարհագրական դիրք և ազգային խնդիր` Արցախի հարցը, և առաջին նախագահի քայլերը շատ տրամաբանական են և քաղաքակիրթ ընդդիմության իսկական օրինակ:
Խոսելով ԱՄՆ պետդեպարտամենտի զեկույցի մասին՝ Հարությունյանը նկատեց, որ դա լուրջ աշխատանք չէ, քանզի այնտեղ գրված է, որ հայ ազգայնականներն իրենց ազդեցության տակ են առել ԼՂ մի մասը, այդ թվում՝ նաև Ադրբեջանին պատկանող յոթ շրջանները. «Եթե զեկույցը նման անլուրջ փաստարկների վրա է գրված, ապա մյուս կետերն արդեն ես հարկ չեմ համարում կարդալ: Եկեք շատ հղում չանենք ուրիշների զեկույցներին, մենք մեր բացերը շատ լավ հասկանում ենք, և դրա լավ օրինակն է ՀՀ նախագահ Սերժ Սարգսյանը, որը նշում է այդ բացերը»:
Մակեյանը մեղադրեց կոալիցիոն կուսակցություններին և դրանց անդամ պատգամավորներին 2008 թ. Մարտի 1-ի արյունալի դեպքերի համար: Նա նշեց, թե ովքեր պաշտպանում են Ռոբերտ Քոչարյանի արարքը, նրանց ձեռքերն էլ են արյունոտ: Հարությունյանն էլ արձագանքեց, որ իր ձեռքերն արյունոտ չեն, իսկ եթե արյունոտ են, ապա թուրքի արյունով. «Ես իմ ընտանիքով 1991 թ. ապրել ու աշխատել եմ ԼՂ-ի Ճարտար գուղում և վերադարձել եմ Երևան, որովհետև որդիս վիրավորվել ու կորցրել է աջ ոտքը: Ես ՀՀՇ առաջին համագումարի պատգամավոր եմ եղել և հեռացել եմ 1989 թ. համագումարից հետո գաղափարական տարաձայնությունների պատճառով, այն ժամանակ ոչ Քոչարյան Ռոբերտ կար, ոչ էլ էն մեկը կար: Պարոն Մակեյան, Դուք որտե՞ղ եք եղել այդ ժամանակ»:
