«Ազատամարտիկներն այսօր հուսալքված են»,- «Առաջին լրատվական»-ի հետ զրույցում նման տեսակետ հայտնեց «Փառապանծ մարտիկներ» ՀԿ նախագահ Գրիշա Սարգսյանը:
Նա հավելեց, որ իրենց ՀԿ-ն համագործակցում է մի շարք այլ հասարակական կազմակերպությունների հետ, որպեսզի իրենց պայքարի արդյունքում ազատամարտիկների խնդիրները կարգավորող օրենք ընդունվի Ազգային ժողովում. «Պետք է կարողանանք համախմբել բոլոր ազատամարտիկներին: Արդեն հաջողվել է որոշ կազմակերպությունների ներգրավել մեր շարժման մեջ՝ «Ազատամարտի վետերանների միություն», «Ղարաբաղի պատերազմի վետերանների միություն», «Արամ Մանուկյան» ջոկատ և այլ կազմակերպություններ արդեն միացել են այդ շարժմանը: Մենք պետք է մեր ազդակը հնչեցնենք, որպեսզի Ազգային ժողովը ընդունի ազատամարտիկի մասին օրենք:
Այս օրհասական պահին դա ազատամարտիկին օդի ու ջրի պես պետք է, որպեսզի ազատամարտիկները սոցիալապես ազատ լինեն, մուրացկանություն չանեն և իրենց ազատագրած հողի վրա կարողանան հպարտ քայլել»,- ասաց Սարգսյանը:
Մեր հարցին՝ ի՞նչ եք կարծում՝ ազատամարտիկներն այսօր խմբերի՞ են բաժանվել, Գրիշա Սարգսյանը պատասխանեց. «Ես գտնում եմ, որ ազատամարտիկները չպետք է քաղաքականությամբ զբաղվեն, դա սխալ է, դա որոշ քաղաքական ուժերի շահերն է հետապնդում. օգտվելով ազատամարտիկների սոցիալական վիճակից՝ պառակտում, խաբում և մասնատում են նրանց»:
