Վրացական Apsny.ge կայքիփոխանցմամբ, իսրայելական ընկերությունները պատրաստ են Աբխազիային մատակարարել ռազմական տեխնոլոգիաներ: Այս մասին հայտնել է իսրայելական IzRus պարբերականը, ըստ որի` իսրայելական Global CST ընկերության պատվիրակությունն արդեն իսկ այցելում է Աբխազիա:
Նշվում է, որ իսրայելական ընկերության աբխազական այցի մասին պայմանավորվածությունը ձեռք է բերվել Մոսկվայում, ուր այդ ընկերության ներկայացուցիչները հանդիպում են ունեցել Աբխազիայի նախագահ Սերգեյ Բաղապշի հետ:
Վրացական կողմի պնդմամբ, Բաղաշը գտնվում է Մոսկվայում` օրեր առաջ իրականացրած թուրքական այցի մասին հաշվետվություն ներկայացնելու համար:
Բացի այդ, վրացական կողմն ուշադրություն է հրավիրում այն հանգամանքի վրա, որ իսրայելական Global CST ընկերության ղեկավարը ՑԱԽԱԼ-ի Գլխավոր շտաբի օպերատիվ վարչության նախկին բաժնի պետ Իսրայել Զիվն է: Ի դեպ, մոսկովյան հանդիպմանը ներկա է գտնվել նաև գործող վարչապետ Մեիր Կլիֆիի նախկին ռազմական քարտուղարը:
Բաղապշի հետ հանդիպման ժամանակ Զիվը հայտարարել է, որ իսրայելական կողմը գիտակցում է Ռուսաստանի ու Աբխազիայի հետ ռազմավարական երկխոսության կարևորությունը: Նա նաև պատրաստակամություն է հայտնել Աբխազիային մատակարարել անվտանգության ոլորտին ու հարձակողական նշանակություն ունեցող ռազմական տեխնոլոգիաներին առնչվող սարքավորումներ:
Աբխազական այցի ժամանակ իսրայելական ընկերության պատվիրակությունը մտադիր է ներկա գտնվել վրաց-աբխազական սահմանագծում: Այդ այցը նախապատրաստել է Global CST հոլդինգի ԱՊՀ և Արևելյան Եվրոպայի դեպարտամենտի ղեկավար Յոսեֆ Միլշտեյնը: Նա անձամբ է մասնակցել Բաղապշի հետ բանակցություններին և այժմ գտնվում է Աբխազիա այցելող իսրայելական պատվիրակության կազմում:
Իսրայելի ԱԳՆ-ը, սակայն, հերքում է, որ իսրայելական պետությունը կարող է ինչ-որ կերպ կապված լինել Աբխազիա այցելող իսրայելական պատվիրակության հետ և այդ այցը որակել է որպես արկածախնդրություն:
Հիշեցնենք, որ ներկայումս վրաց-իսրայելական հարաբերություններում որոշակի լարվածություն է տիրում: Օրեր առաջ վրաց-իսրայելական «բիզնես պատերազմներին» հավելվեց նաև այն, որ Իսրայելը Վրաստանին ներառեց «սև ցուցակում»` իր քաղաքացիներին խորհուրդ տալով չայցելել Վրաստան:
Իսրայելական կողմը դա «պատճառաբանեց» նրանով, որ Վրաստանում իր քաղաքացիները կարող են առևանգվել «Հիզբոլլահ»-ի և ՀԱՄԱՍ-ի ահաբեկիչների կողմից:
